"Törek Titaniğı" belän başlanğan duslıq

Törkiyä ilbaşı Räcäp Tayyip Ärdoğan Yaponiyä xökümäte räise wazıyfasına bilgelängän Suga Yoşixideğa qotlawnamä cibärde.

Ul üzeneñ xatında Törkiyä belän Yaponiyä arasındağı tarixi duslıq nigezeneñ 130 yıl êlek salınuın xäterlätte. 1890nçı yılnıñ 16nçı sentyabrendä Kişimoto şähäre yanında “Ärtugrul” fregatı waqıyğası bula. Anı ikençe törle törek Titanigı dip tä yörtälär. Ğosmanlıdan Yaponiyägä säfär qılğan korab ike aradağı mönäsäbätlärneñ başlanğıçı dip isäplänä. Ämma “Ärtugrul” qaytu yulında ştormğa êlägep bata…

Ärdoğan bu könne duslıqnıñ başlanuın häm Suga Yoşixideneñ dä älege könne wazıyfağa bilgelänüen ayırım assızıqladı. “Däräcäle zatnıñ bu ähämiyätle êşkä bu qadär mäğ’näle köndä saylanuı duslıq tarixıbız nisbätennän gacäyep matur küreneş. Bu tirän tamırlı duslığıbıznı 2013nçe yılda tözegän strategik xezmättäşlek nigezendä, däräcäle zatlarnıñ liderlığında häm möhim kertemnäre belän tağın da yuğarı däräcägä citkerügä ömetlänäm,”-dip yaza ul.

İlbaşı Ärdoğan Yaponiyäneñ xalıqara cämäğat’çelekneñ xörmätle häm aldınğı äğ’zası buluın, totrıqlılıq häm üseşkä öleş kertüen soqlanıp küzätülären dä citkerde.

“Geografik yıraqlıqqa da qaramastan, ber-bersenä küneldän kürşe bulğan törek häm yapon millätläreneñ berdäm tırışlıqlar belän xalıqara cämäğat’çelekkä yünäleş birerdäy öleş kertä aluına böten yörägem belän ışanam. Bu poziśiyädä ikeyaqlı, regional’ häm xalıqara mäs’älälärdä sezneñ belän xezmättäşlek itüne söyenep qarşılayaçaqmın,”-diyelä täbriknamädä.

İlbaşı çın küñeldän Yaponiyä xalqına isänlek häm üseş teläwen dä citkerä.