Kievta Qırım platforması sammitı

Ukraina tışqı êşlär ministrı Dmitro Kulebanıñ moderatorlığında Kievtağı ber qunaqxanädä ütkärelgän yuğarı däräcäle oçraşuda Ukraina Däwlät başlığı Volodimir Zelenskiy belän bergä Portugaliya İlbaşı Marselu Rebelu De Souza, Litva Däwlät başlığı Gitanas Nauseda, Macarstan (Vengriya) İlbaşı Katalin Novak, qırım tatarlarınıñ milli liderı Mostafa Abdülcämil Qırımoğlu häm küp sanda delegat qatnaştı.

Törkiyäne İlbaşı idaräseneñ baş kiñäşçese, tulı wäqalätle ilçe Akif Çağatay Qılıç wäkillek itkän cıyılışta Franśiya Däwlät başlığı Êmmanuêl Makron, Pol’şa Prezidentı Andjey Duda, Latviya İlbaşı Edgars (Эдгарс) Rinkeviçs, Êstoniya (Эстония) Däwlät başlığı Alar Karis häm bik küp il liderı cibärgän video yullamalar kürsätelde.

Törkiyä İlbaşı Räcäp Tayyip Ärdoğan da, yuğarı däräcäle oçraşuğa yullama cibärep, qırım tatar xalqına yaqlawın citkerde.

Zelenskiy, cıyılışta yasağan çığışında yuğarı däräcäle oçraşunıñ ähämiyätenä işarät itep: “Bıyıl sammitta Awrupadan, Aziyadan, Amerikadan häm Afrikadan 63 il häm xalıqara oyışma wäkillek itelä. Här yıl tağın da kübräk qatnaşuçınıñ buluı - yawlap alunıñ xalıqara xoquqqa häm keşelärgä qarşı cinayät’ buluınıñ global’ külämdä qabul itelüe mäğ’näsenä turı kilä”, - dip bäyäläw yasadı.

Qırım tatarlarınıñ milli liderı häm Ukraina xalıq ışanıçlısı Mostafa Abdülcämil Qırımoğlu da, Rusiyä tarafınnan 2014nçe yılda anneksiyälängän Qırımnıñ azat itelüeneñ zarurlığın belderep: "Cirlärebezneñ yawdan azat iteläçägennän häm Ukrainanıñ cir bötenlegenä suzılğan qullarnıñ sındırılaçağınnan hiç şöbxäbez yuq”, - dip äytte.

Törkiyä İlbaşı idaräseneñ baş kiñäşçese, tulı wäqalätle ilçe Akif Çağatay Qılıç ta, Törkiyäneñ 2014nçe yıldan birle Qırımnıñ anneksiyäsenä qarşı açıq häm êzlekle säyäsätne alıp baruın xäterlätep: "Yaqlawıbız bu suğış betkännän soñ da ozaq waqıt buyı däwam itäçäk”, - dide.

Vengriya (Macarstan) İlbaşı Katalin Novak ta: "Ukraina belän bergä bulu torışıbızğa, açıq poziśiyäbezgä häm Rusiyäneñ nigezsez agressiyäseneñ gäyıplänüenä ixtıyacıbız bar”, - dip äytte.

İtaliya Baş ministrı Giorgia Meloni da sammitqa cibärgän video yullamasında, Könbatışnıñ 2014nçe yılda yäşängännärne tulısınça abaylap añlamawına işarät itep: "2014nçe yıldağı bu waqıyğalar Könbatışta yaxşılap añlaşıla alınmadı yäki, bälki dä, Mäskäwneñ imperialist adımınıñ biredä tuqtap qalaçağı ömet itelde. Bez yalğıştıq häm monı qabul itärgä kiräk”, - dip belderde.

Litva, Latviya, Êstoniya, Pol’şa häm Finlyandiya liderları da Qırımnı yaqlap yullamaların citkerde.