İzrailneñ İranğa höcüme öçen Azärbaycan cirläre qullanılmayaçaq

İzrailneñ “The Jerusalem Post” gazetına äñgämä birüçe Mämmädov Azärbaycannıñ İzraildän täêmin itkän zur külämle qoral importına bärabär bu ilgä xärbi operaśiyälärendä yärdäm itü öçen hawa mäydanın äzerläwe turında İzrail matbuğatında çıqqan xäbärlärne kire qaqtı.

Küptän tügel wäqalätle ilçe bulıp Tel’-Avivkä bilgelängän Mämmädov: "Azärbaycan baştan birle başqa illärneñ êçke êşlärenä tıqşınmayaçağın häm cirläreneñ başqa illärgä qarşı qullanıluına röxsät birmäyäçäğen bäyan itte. Çönki başqa illärneñ dä bezneñ êçke êşlärebezgä qatışmawın kötäbez,” – dip äytte.

Mämmädov matbuğatta monıñ kiresen isbatlawçı raslawlarnıñ “nigezsez” buluına basım yasadı.

İzraildän qoral importlawnıñ isä normal’ buluına işarät itüçe Azärbaycan ilçese: "Här il üz cir bötenlegen häm watandaşlarınıñ suverenlığın saqlawdan häm yaqlawdan cawaplı. Azärbaycan da iskärmä tügel. İzrail küp sanda qoral êşläp çığara, şuna kürä bu qorallarnı İzraildän satıp alu normal’,” – dip äytte.

Azärbaycan 2020nçe yılnıñ 27nçe sentyabr könne başlanğan häm 44 kön däwam itkän 2nçe Qarabax suğışında 30 yıl êlek Ärmänstannıñ yawlap alğan cirlären azat itkän ide.

İrannıñ şuşı waqıttan birle Azärbaycanğa qarata totışı häm çik buyındağı xärbi künegüläre ike il mönäsäbätlärendä kiyırenkelekne arttırğan ide.

İrannıñ räsmi bularaq "ğadäti künegülär" dip açıqlağan xärbi köçen kürsätüe Azärbaycan tarafınnan Ärmänstanğa yaqlaw häm İrannıñ şuşı çik buyı töbägendäge üzgäreşlärne qabul itmäyäçäge yullaması bularaq añlaşılğan ide.