Tatarstan xäbärläre 29/2023

Tatarstan Räise Türkiyäneñ Qazandağı General’ konsulı belän oçraştı

Kiçä (20 nçe martta) Tatarstan Räise Röstäm Miñnexanov Türkiyäneñ Qazandağı General’ konsulı İsmät Êrikan belän oçraştı. Oçraşu Tatarstan xökümäte Yortında Röstäm Miñnexanovnıñ êş kabinetında uzdı.Tatarstan citäkçeseneñ matbuğat xezmäte xäbär itkänçä, alar xezmättäşlekne nığıtu, êşlekle bağlanışlarnı üsterü turında fiker alıştı.

İsmät Êrikan 2023 nçe yılnıñ fevralendä ilneñ kön’yaq-könçığışında cir teträwdän zıyan kürgän Türkiyä xalqına yärdäm kürsätkännäre öçen Tatarstan xalqına räxmät belderde.

Tatarstannıñ aldınğı sänäğät’ oyışmaları, xäyriya fondları, dini oyışmalar, şulay uq respublikanıñ bitaraf bulmağan meñlägän xalqı cir teträwdän zıyan kürüçelär öçen aqça häm gumanitar yärdäm cıyuğa üzlärennän zur öleş kertte. 

“Bez yöräkläregezneñ bezneñ belän buluın toydıq”,- dide Türkiyäneñ Qazandağı general’ konsulı İsmät Êrikan.

“Bezneñ burıç - awır waqıtta tuğandaş törek xalqına yärdäm itü, bez çittä qala almadıq” ,-dide Röstäm Miñnexanov.

Röstäm Miñnexanov keçe xac qıldı

Soğud Ğaräbstanına êş säfäre qısalarında Tatarstan Räise Röstäm Miñnexanov räsmi oçraşular tämamlanğannan soñ respublika möftiye Kamil xäzrät Sämiğullin belän bergä ğomrä - keçe xac qıldı.

Ğomrä - xac qılu waqıtınnan başqa yılnıñ telägän könendä xac qılu. Ğomrä xacın ğomerdä ber tapqır başqaru sönnät ğamäl.

Türkiyäneñ Qazandağı General’ konsullığında tantanalı çara uzdı

Türkiyäneñ Qazandağı General’ konsullığında Çanakkalä bäreleşlärendä şähit bulğannarnı iskä alu köne,Türkiyäneñ milli gimnı qabul itelüneñ 102 yıllığı uñayınnan tantanalı çara ütkärelde. Türkiyäneñ Qazandağı General’ konsulı İsmät Êrikan üzeneñ çığışında dön’yanıñ iñ zur hälakätlärennän berse bulğan cir teträw mönäsäbäte belän, älege faciğanı üz xäsrätläre itep qabul itep, yärdäm qulı suzğan Tatarstan xalqına räxmätlären citkerde.

İsmät äfände şulay uq Türkiyäneñ milli gimnı tarixına qarağan qızıqlı mäğ’lümatlar citkerde. “İstiklal Marşı”nıñ (“Bäysezlek marşı”) avtorı Mäxmät Akif Êrsoy şäxesenä mönäsäbätle istälekläre belän urtaqlaştı ,aña bulğan ixtiram häm xörmät xislären belderde.

Türkiyä gimnı tarixına küz salsaq, bäygedä barlığı 724 şiğır’ qarala, 24 kompozitor üz köylären täq’dim itälär.

Tantanalı çarada tanılğan şağıyr’ Rämis Aymät Türkiyädä cir teträw unayınnan icat itelep Awraziya yazuçılar berlegeneñ “Qardäş qalämnär” junalında dön’ya kürgän şiğıren uqıdı, törek qardäşlärebezneñ tirän qayğısın urtaqlaştı.

Soñınnan Çanakkalä bäreleşlärendä häm cir teträw, su basu näticäsendä hälaq bulğan barlıq şähitlär istälegenä doğa uqıldı.

Türkiyä tışqı êşlär ministrlığı Tatarstan Räisen Näwrüz belän qotladı

“Näwrüz - igeleklelek, sabırlıq, berdämlek häm teläktäşlek bäyräme. Bıyıl Tatarstan Türkiyägä bu bäyräm belän simvollaştırılğan xislärne toyarğa mömkinlek birde” dip bilgeläp ütte Türkiyä tışqı êşlar ministrı Mävlüt Çavuşoğlu.

 “Bıyıl bez Näwrüzne 2023 nçe yılnıñ 6 nçı fevralendä Kaxramanmaraşta bulğan ike cir teträwdän alğan yaralarnı däwalaw kebek xäsrät belän qarşı alabız. Min şulay uq faciğale cir teträwdän soñ sez bezgä Näwrüz simvollaştırğan bu yuğarı xislärne tiränten toyarğa mömkinlek birgänegez öçen räxmät süzlären belderäm“,- dide Mävlüt Çavuşoğlu.

Ul Rusiyägä häm Türkiyägä, şulay uq böten dön’yağa tınıçlıq, tatulıq häm çäçäk atu, ä Röstäm Miñnexanovqa häm Tatarstan xalqına sälamätlek, bäxet häm iminlek teläde.

Tanılğan cırçı Êmil’ Cäläletdinovnı soñğı yulğa ozattılar

 Tatar cämäğat’çelege zur yuğaltu kiçerde.19 nçı mart könne legendar cırçı, kürenekle şäxes, Rusiyäneñ atqazanğan häm Tatarstannıñ xalıq artistı Êmil’ Usman ulı Cäläletdinov arabızdan mäñgelekkä kitte.

Üzeneñ böten icat êşçänlegen, barlıq talantın klassik muzıka sänğäten üsterügä bağışlağan tanılğan şäxes belän xuşlaşu märasime 20 nçe martta Qazannıñ Märcäni mäçetendä uzdı. 

Artistnı Märcäni mäçetenä qarağan möselman ziratına, 2021nçe yılnıñ cäyendä ülgän xatını Venera qabere yanına cirlädelär.