Awraziyä cömhüriyätläreneñ kön tärtibendäge waqıyğalar

Ağımdağı yılnıñ 7nçe mayında Vengriyä tışqı êşlär häm tışqı säwdä ministrı Peter Siyyarto Üzbäkstanğa säfär yasadı. Anı Taşkentta Üzbäkstan ilbaşı Şäwkät Mirziyayev qabul itte. Räsmi qunaq Üzbäkstan-Vengriyä xökümätlärarası komissiyä cıyılışında qatnaştı. Şunı da äytergä kiräk, Üzbäkstan Awrupa illärennän kiläçäk investorlar öçen maxsus irekle iq’tisadi töbäk tözi.

7nçe mayda Vladimir Putin ant itep 5nçe tapqır Rusiyä däwlät başlığı wazıyfasına kereşte. Ul tağın 6 yıl il belän idarä itäçäk. 10nçı mayda Däwlät Dumasınıñ raslawın alğan Mixail Mişustin isä qabat Rusiyä xökümäte räise buldı.

9nçı mayda Mäskäwdä Awraziya yuğarı iq’tisadi şurası 10nçı cıyılışın ütkärde. Anda Rusiyä, Belarus’, Ärmänstan, Qazaqstan, Qırğızstan, Kuba häm Üzbäkstan liderları qatnaştı. Cıyılış qısalarında bik küp ikeyaqlı oçraşular da buldı. Şul uq könne liderlar Böyek Ciñü tantanasında da qatnaştı. Alarğa Törekmänstan häm Gagauz töbäge citäkçeläre dä quşıldı.

10nçı-11nçe mayda Almata şähärendä Azärbaycan häm Ärmänstan tışqı êşlär ministrları solıx söyläşüläre ütkärde. Soñınnan yasalğan belderüdä yaqlar arasında fiker qarşılıqları barlığı, çişeleş kötüçe mäs’älälär xaqında söyläşülärneñ däwam itäçäge äytelde.

Yerivanda oppoziśiyä Azärbaycan belän solıx söyläşüläre uzdıruğa protest belderä.

6nçı mayda Baqıda Xalıqara törki akademiyä Törki dön’yanıñ urtaq älifbası komissiyäseneñ 2nçe utırışın uzdırdı. Anda Qazaqstan, Qırğızstan, Tön’yaq Kipr Törek cömhüriyäte, Üzbäkstan häm Törkiyä qatnaştı.

 7-8nçe may könnärendä Azärbaycan xökümäte räise Ali Asadov Törkiyägä räsmi säfär yasadı. Ul başta Kaxramanmaraşqa barıp cir teträwdän zıyan kürüçelär öçen Azärbaycan tözetä torğan toraqlarnı qaradı. 8nçe mayda räsmi qunaqnı Änkarada Törkiyä ilbaşı Räcäp Tayyip Ärdoğan qabul itte. Şul uq könne Ali Asadov häm Törkiyä ilbaşı urınbasarı Cäwdät Yılmaz Törkiyä-Azärbaycan 11nçe çor qatnaş iq’tisadi komissiyäse cıyılışında qatnaştı.

8nçe mayda Bolgariyä xökümäte räise Rumen Radev Azärbaycanğa räsmi säfär yasadı. Baqıda anı Azärbaycan ilbaşı İlham Äliyev räsmi tantana belän qarşı aldı. Söyläşülärdän soñ ike il arasında strategik xezmättäşlekne nığıtu turında belderge imzalandı.  

Nikol’ Paşin’yan Mäskäwdä çaqta Yerivannan Ärmänstannıñ Kollektiv qurqınıçsızlıq kileşüe oyışması belän mönäsäbätlären passivlaştıruı, bıyıl öçen vznosı tülänmäwe turında belderülär yasaldı.

Gruziyä parlamentı 1nçe mayda çit il agentlarına qağılışlı qanun proyektın qabul itkän ide. Şul könnän birle oppoziśiyä qanunnıñ kire alınuın taläp itep mitinglar oyıştıra. Gruziyä häm Ärmänstanda Könbatış belän Rusiyä bäxäsläre qızdı.