Tatarstan xäbärläre 09/2024

Qazanda “Kiläçäk uyınnarı” çaraları açıldı

Tatarstan başqalası Qazanda “Kiläçäk uyınnarı” çaraların açu tantanası oyıştırıldı.

“Qazan Êkspo”da ütkärelgän çaranıñ açılışına Rusiyä däwlät başlığı Vladimir Putin, Üzbäkstan ilbaşı Şäwkät Mirziyayev, Qırğızstan prezidentı Sadıyr Capparov, Qazaqstan däwlät başlığı Qasıym Comart Toqayev, Tacikstan ilbaşı Êmomali Raxmon, Belarus’ prezidentı Aleksandr Luşakenko häm başqalar kilde.

Tatarstan Räise Röstäm Miñnexanov “Kiläçäk uyınnarı” Xalıqara mul’tisport turnirında qatnaşuçılarğa häm qunaqlarğa räxmät belderde. Ul 21 fevral’dä Qazanda ütkän açılış tantanasının uñışlı uzuın äytte.

Röstäm Miñnexanov Tatarstan xalqın Xalıqara tuğan tel köne belän qotladı

Tatarstan Räise Röstäm Miñnexanov Telegram-kanalında yazıluçılarnı Xalıqara tuğan tel köne belän täbrik itte. Ul istälekle datanı Qazanda uzuçı “Kiläçäk uyınnarı” xalıqara mul’tisport turnirı belän bäyläp qotladı.

Respublika citäkçese video yazma da urnaştırğan, anıñ geroylarına tuğan telne qullanu köç birä häm näticädä fidjital-turnirda ciñü alıp kilä.

“Xalıqara tuğan tel köne belän! Här teldä xalıqnın canı çağıla. Tuğan telebezne saqlıyq”, - dip yazğan Röstäm Miñnexanov.

Röstäm Miñnexanov Törkiyä prezidentı Räcäp Tayyip Ärdoğannı 70 yäşe belän qotladı

Tatarstan Räise Röstäm Miñnexanov Törkiyä ilbaşı Räcäp Tayyip Ärdoğanğa 70 yäş’lek yubileye uñayınnan qotlaw telegramması yulladı. Bu xaqta “Tatar-inform” agentlığına Tatarstan Räiseneñ matbuğat xezmäte citäkçese Liliyä Ğalimova xäbär itte.

“70 yäş’ tulu uñayınnan iñ izge qotlaw süzlären qabul itegez. Sezgä häm yaqınnarığızğa sälamätlek, iminlek telim. Küp’yıllıq aktiv säyäsi êşçänlegegez, iñ yuğarı däwlät wazifalarında näticäle êşegez belän sez tuğan ilegezdä zur abruy qazandığız häm Törkiyä xalqı irekle saylawlar barışında sezneñ citäkçelektä yäşäw häm êşläw omtılışın küp tapqırlar rasladı”, - dip bilgeläp ütte Tatarstan Räise.

Röstäm Miñnexanov Törkiyä ilbaşına “nıq sälamätlek häm ozaq yıllarğa citärlek optimizm, masştablı häm cawaplı êşçänlegendä uñışlar, Törkiyä xalqı häm ğomum dön’ya iminlege xaqına barlıq niyätläreneñ ğamälgä aşuın” teläde.

Qazanda Qırğızstannıñ General’ konsullığı açıldı

Qazanda Qırğızstannıñ General’ konsullığı açıldı. Bu xaqta şähärneñ turizmnı üsterü komitetında xäbär ittelär.

General’ konsullıknıñ açıluı partnyerlık mönäsäbätlären üsterügä häm diplomatik êlemtälärne nığıtuğa yärdäm itä. Diplomatik wäkilçelek ike il watandaşları öçen dä konsullık xezmätlären uñaylı itärgä yärdäm itäçäk.

General’ konsullıkka Spartak uramı, 6 adresı buyınça möräcäğat’ itärgä mömkin.

Qazan bu qışta turistlar arasında iñ populyar yünäleşlär isemlegenä kerde

Qazan bu qışın Rusiyädäge iñ populyar yünäleşlär arasında dürtençe basqıçta urnaştı. Turistlarnıñ 2,7%ı Tatarstan başqalasında bulıp kitkän. Bu uñaydan barı tik Mäskäw, Sankt-Peterburg häm Soçinıñ ğına kürsätkeçläre yuğarıraq, dip yaza “İzvestiya” gazetı.

Berençe unlıqqa şulay uq Yekaterinburg, Krasnodar, Tübän Novgorod, Kaliningrad, Novosibirsk häm Rostov-Don şähärläre kergän.

Analitiklar çit il turlarına da analiz yasağan. İstanbul, Dubai häm Bangkok iñ populyar şähärlär bulıp çıqqan.

Taşkent şähärendä izü bizäklären yasaw buyınça master-klass uzdı

Taşkent şähäreneñ Tatar mädani üzägendä “Aq qalfaqlar”lılar öçen tradiśion tatar xatın-qız kostyumı êlementı bulğan izü bizäklären yasaw buyınça master-klass uzdı. Bu xaqta Bötendön’ya tatar kongressı matbuğat xezmäte xäbär itä.

İzü – bäyräm häm köndälek kiyemnärgä östämä, küzdän saqlawçı äyber.

Sänğat’ belgeçe häm kostyumnar buyınça rässam Gölnara İşmoratova bu êlementnıñ maqsatı turında söyläde, tuqımalarnı faktura buyınça niçek saylarğa häm bizäklärne niçek yasarğa ikänen kürsätte.

Master-klassta här qatnaşuçı xatın-qızğa ber atna êçendä üz kükräkçäsen tegärgä waqıt birelde, diyelä xäbärdä.