Käriman Xalis
Bolarnı beläsezme? 57/2023
Bolarnı beläsezme? 57/2023
1932nçe yılda ber törek qızınıñ “Dön’ya çibäre” bulıp saylanuın beläsezme?
1923nçe yılnıñ 29nçı üktäbr’ könne tözelgän Törkiyä Cömhüriyäteneñ berençe maturlıq (çibärlek) bäygese 1929nçı yılda oyıştırıla. Xökümät tä yärdäm itkän şuşı bäygeneñ berençese Färixa Täwfik bula.
1930nçı yılda oyıştırılğan bäygegä iptäşläreneñ qatğıy üteneçläre belän möräcäğät itkän Käriman Xalis ğailäse röxsät itmägäne öçen ikençe turda qatnaşa almıy. İke yıldan soñ 1932dä ğailäseneñ röxsäte belän dürtençese oyıştırılğan Törkiyä maturlıq bäygesendä qatnaşa häm berençe bulıp saylana. Annan soñ 1932nçe yılnıñ 31nçe iyül’ könne Bel’giyanıñ Spa şähärendä oyıştırılğan Bötendönya maturlıq bäygesendä (Miss Dön’ya konkursında) Törkiyäne wäkillek itä. Bu çarada 28 il arasınnan Käriman Xalis Bötendönya maturlıq patşabikäse bulıp saylana häm “Vive la Mustafa Kemal, Vive la Miss Turquie!”“Yäşäsen Mostafa Kemal! Yäşäsen Törkiyä çibäre” söyeneçläre arasında törek bayrağı belän säxnägä çığıp, tamaşaçılarnı sälamli.
Bäygedän soñ Törkiyägä qaytqan Käriman Xalis zur xalıq törkeme tarafınnan qarşı alına häm Mostafa Kemal’neñ teläge belän kiçä oyıştırıla. Bu kiçädä Käriman Xalisne mañgayınnan üpkän Mostafa Kemal’: “Siña Äcä dip äytäcäkmen”, - di. Törek xatın-qızına möhim missiya yöklägän, xatın-qız xoquqları ölkäsendä alıp barılğan köräştä möhim dip sanala alınaçaq şuşı waqıyğadan soñ 1934nçe yılda qabul itelgän Familiya qanunı qısalarında Käriman Xaliskä Atatörek tarafınnan “patşabikä” mäğ’näsenä turı kilgän “Äcä” familiyası birelä.
Käriman Xalis Äcä yäş’ Törkiyä Cömhüriyäten dönyağa tanıtu, söyderü häm qabul itterü öçen bik küp proyıktnıñ reklama yöze bulu burıçın üz östenä ala, il tanıqlığın häm başqa illär arasında üz urının bilgeläwdä möhim wazıyfa başqara.
Käriman Xalis Äcädän soñ dönya çibäre däräcäsen alğan ikençe törek qızı 2002nçe yılda Azra Akın bula.
Tatarça podkastlar (тавыш язмаларыбыз)
