Törek kuxnyasında yoğırt (йогырт)
Bolarnı beläsezme? 51/2023
Bolarnı beläsezme? 51/2023
Törek kuxnyasında yoğırtnıñ (йогыртның) küp töre barlığın beläsezme?
Bügenge köndä yoğırtnıñ sälamätlek öçen bik faydalı buluı bilgele häm ul dön’yanıñ küp illärendä kiñ qullanıla. Kibetlärdä probiotik, laktozsız, yarım maylı, sözelgän, ciläk-cimeşle kebek distälägän yoğırt törek tabarğa mömkin. Törek kuxnyasındağı yoğırt törläre isä şaqtıy. Yoğırt Anadolunıñ törle poçmaqlarında,xätta öydän -öygä dä ayırılıp tora. Yoğırt tämenä täêsir itüçe faktorlarnıñ berse - anı yasağanda qullanılğan söt. Bügenge köndä iñ ciñel tabılğan söt sıyır söte, şuña kürä bu söttän yasalğan yoğırtlar yış oçrıy. Läkin şulay uq sarıq, käcä häm buyvol söte belän yasalğan yoğırtlar bar häm alarnıñ barısınıñ teskturası häm täme törle. Sarıq yoğırtı beraz açkıltım, sıyır yoğırtı beraz äçe. Buyvol sötennän yasalğan yoğırt bik quyı, anda kal'śiy häm sıyfatlı aqsım başqa yoğırtlarğa qarağanda kübräk.
Türkiyäneñ yoğırtı belän danlıqlı töbäkläre dä bar. Mäsälän İstanbulnıñ Kanlıca rayonı ber ğasırdan artıq yoğırtı belän bilgele. İstanbulnıñ Silivri ilçäse dä yoğırtı belän dan tota. Yaqınça 130 yıllıq tarixı bulğan Silivri yoğırtı 1870 nçe yıllarda barı tik yoğırt yasaw öçen tözelgän yoğırt yortında citeşterelgän häm İstanbulğa kiterelgän. 1930 nçı yıllarda mäydanın kiñäytep zur şähärlärgä dä cibärelä başlağan Silivri yoğırtı bügenge köndä dä populyarlığın saqlıy.
Türkiyädä yoğırt törlelege belän berrättän annan yasalğan aşamlıqlar da küp. Törek kuxnyasında yoğırt şulpalardan, salqın qabımlıqlar, desertlar, souslarğa qadär küp aşamlıqlarda qullanıla. Mäsälän Dänizlidä häm anıñ tiräsendä käcä söten qaynar kästrülgä salıp beraz yanğan täm birelgän yoğırt gril’ yäşelçäläre belän tabınğa birelä. Xataynıñ tozlı yoğırtın zäytün mayı häm tämlätkeçlär quşıp aşıylar. Yoğırt - rizıq äzerlägändä qullanılamı, yuqmı, ul töreklär tabınında härwaqıt alıştırğısız aşamlıq.
