Tatarstan xäbärläre 38/2023

Tatarstanda bulıp uzğan qayber waqıyğalarğa qısqaça küzätü

1989410
Tatarstan xäbärläre 38/2023

Tatarstan Räise “İzge Bolğar cıyını” açılışında qatnaştı

Tatarstan Räise Röstäm Miñnexanov borınğı Bolğar şähärendä buldı häm İdel buyı Bolğarstanınıñ İslam dinen räsmi qabul itü könenä bağışlanğan “İzge Bolğar cıyını” çarasın açuda qatnaştı.

Şulay uq tantanada Rusiyä prezidentınıñ êçke säyäsät idaräse dini oyışmalar belän xezmättäşlek departamentı başlığı Yevgeniy Yeremin Rusiyä möselmannarınıñ Üzäk diniyä näzaräte räise Tälğat’ Tacetdin, Rusiyä Möselmannarı diniyä näzaräte räise Rawil Ğaynetdin, Rusiyä Möselmannarı diniyä näzaräte möftiye Älbir Krganov qatnaştı.

Uzğan könnärdä Qazanda berniçä möhim çara – KazanForum häm “Rusiyä – İslam dön’yası” strategik qaraş törkeme utırışı uzdı. Tatarstan başqalasına dön’yanıñ 80nän artıq ilennän 16 meñ keşe kilde.

Röstäm Miñnexanov Cämığ mäydanında köndezge namazda qatnaştı, Rusiyä Möselmannarı diniyä näzaräteneñ bäyräm çatırında buldı, şulay uq bilbaw köräşe buyınça xalıqara yarışlarnıñ final uyınnarın küzätte.

“İzge Bolğar cıyını” tradiŝion räweştä 21 mayda bilgeläp ütelä.

Türkiyädä Anadoluda soŝializmğa yünäleş birüçe tatar turında dissertaŝiya yaqlandı

Türkiyäneñ Märmärä universitetında tatar dön’yasında älegäçä tanılmağan şäxes – Zinnätulla Nävşirvanov häm anıñ säyäsi êşçänlege belän bäyle fänni dissertaŝiya yaqlandı. Ğıyl’mi xezmätneñ avtorı – törki dön’ya tikşerenüläre institutı törek tarixı häm ğomumi törki tarix kafedraları magistrantı Büşra Ünalan.

Dissertaŝiyaneñ teması “Qazanlı törkiçä soŝialist Zinnätulla Nävşirvanov häm anıñ äsärläre” dip atala. Büşra Ünalan bu fänni xezmäten Nadir Däwlätneñ êlekkege şäkerte, Märmärä universitetı ğomumi törki tarix kafedrası citäkçese, professor Äxmät Qanlıdärä citäkçelegendä yazğan.

Yäş’ ğalimä Ünalan Zinnätulla Nävşirvanovnıñ tormış yulın häm anıñ êşçänlegen, fikerlären öyrängän, Ğosmanlı ile matbuğatında basılğan mäqalälären tikşergän, Nävşirvanov belän aralaşqan şäxeslärne häm alarnıñ xezmätlären küzdän kiçergän.

Päyğambärebez yädqar’läre “Qol Şärif”kä kiterelde

Başqalabıznıñ “Qol Şärif” mäçetendä päyğambärebez Möxämmäd sallällahu ğaläyhi wä sällämneñ, anıñ ğailä äğzaları häm säxabäläreneñ yädqar’läre êkspoziŝiyase belän tanışırğa bula. Mondıy kürgäzmä Tatarstan tarixında berençe tapqır uza häm nibarı ike kön!

Möxämmäd päyğambär häm anıñ säxabäläreneñ yädqar’läre Dağıstannan maxsus kiterelgän. Dağıstan möftiye urınbasarı Möxämmädrasül xaci Saaduyev bilgeläp uzğança, êkspoziŝiyane kürergä kilüçelärneñ sanınnan ğına da alarnıñ niqadär qaderle buluları häm Päyğambärebezne niçek yaratuları kürenä.

Êkspoziŝiyadä Päyğambärebez Möxämmädneñ may qasäse häm qılıçı, säxabä Bilal radıyallahu ğanhu, Rasülebezneñ xatını Ğayşä häm qızı Fatıyma radıyallahu ğanhälärneñ çülmäkläre, qul tegermäne, Xalid bin äl-Wälid radıyallahu ğanhuneñ säfärlärdä yörtä torğan flyajkası häm köbäse, Äbü Bäker äs-Siddıyq radıyallahu ğanhuneñ pıçağı häm başqalar urın ala.

Yädqar’lärne bügen 23 may könne “Qol Şärif” mäçete xollında 19.00ğa qadär qarap bulaçaq.

Cämäğat’ êşleklese, cırçı Zöfär Safinnı soñğı yulğa ozattılar

Kiçä tanılğan cämäğat’ êşleklese, cırçı Zöfär Safinnı soñğı yulğa ozattılar. Märxüm belän xuşlaşu Qazannıñ Märcani mäçetendä ütte.

Xuşlaşırğa kilgännär Zöfär Safin belän bäyle törle istäleklär belän büleşte, cılı süzlär äytte. Anıñ quyı bödrä çäçlärenä batırıp tübätäy kiyep milli çaralarğa kilüen iskä töşerdelär.

Zöfär Safin 1968 yılda Çistay rayonı Aqbulat awılında tua, Tübän Qamanıñ “Yäş’lek” mädäniyät yortında cırçı bulıp êşli. 1987-1991 yıllarda Qazan däwlät konservatoriyasendä häm Qazan däwlät mädäniyät institutında uqıy.

1995-2003 yıllarda – Tatar däwlät filarmoniyasendä solist. Xatını Nailä Safina şulay uq professional’ cırçı. Märxüm tuğan awılında – Çistay rayonı Aqbulat awılında cirlände. Zöfär Safinnıñ ike balası qaldı, anıñ olısı ikençe sıynıfta uqıy.

Bügenge yazmabızda Tatarstan Räiseneñ matbuğat xezmäte, “Şähri Qazan” gazetınıñ internet säxfäse belän “Tatar-inform” xäbär agentlığı yazmaları qullanıldı.



Bäyläneşle xäbärlär