Tatarstan xäbärläre-35/2023

Qazanda Tuqay bäyräme

Uzğan atna Tatarstanda bulıp uzğan waqıyğalar arasında iñ ähämiyätlese – Tuqay tuğan kön ide dip äytergä mömkin. Çaralar tradiśiyä buyınça irtän xalqıbıznıñ böyek şağıyreneñ Qazandağı häykälenä çäçäklär salu häm şiğır’ bäyräme belän başlanıp kitte. Anda Tatarstan räise Röstäm Miñnexanov, däwlät kiñäşçese Mintimer Şäymiyev, başqa räsmi zatlar,  yazuçılar, şağıyr’lär, sänğat’ ähelläre, ğalimnär häm aktivistlar qatnaştı. Bu könneñ tağın ber ähämiyätle çarası – Gabdulla Tuqay isemendäge Tatarstan däwlät büläklären tapşıru tantanası. Bıyıl älege premiyägä rässam Nailä Kumısnikova, arxitektor Firdäwes Xanov, şağıyr’ Şäwkät Ğadelşa iyä buldı. Laureatlarnı Musa Cälil isemendäge Tatar däwlät akademiyä opera häm balet teatrı säxnäsennnän Röstäm Miñnexanov täbrikläde. Anda Ğabdulla Tuqaynıñ tuuına 137 yıl tuluğa bağışlanğan tantana uzdı.

“Min yuğarığa omtılam”

Ğabdulla Tuqaynıñ tuğan köne uñayınnan Tatarstan Milli muzeyı häm Tuqay isemendäge “Qazan” xalıqara aêroportınıñ aêrovokzal kompleksında böyek tatar şağıyreneñ tormışı häm icatına bağışlanğan fotoräsem kürgäzmäse açıldı. Bu xaqta Tatarstan mädäniyät ministrlığı xäbär itä. “Min yuğarığa omtılam” dip isemlängän çaranıñ ädipneñ isemen yörtüçe aêroportta açıluı ayıruça mäğ’näle. Räsemnärdä Tuqay üse, anıñ zamandaşları – 20nçe ğasır başı tatar mädäniyäte wäkilläre sürätlängän. Anda yazuçı häm publiśist Ğayaz İsxaqıy, dramaturg Ğafur Qoläxmätov, tatar teatrına nigez saluçılarnıñ berse – Ğaliäskar Kamal, aktyer häm rejissyer Ğabdulla Kariyev, aktrisa Säxipcamal Ğıyzzätullina-Voljskaya häm başqalarnı kürergä mömkin. Êkspoziśiyä xalıqara reyslar kilü öleşe 1A terminalında 24nçe aprel’dän 3nçe mayğa qadär êşli.   

Tatarstan belän Azärbaycan xezmättäşlege

Tatarstan räise Röstäm Miñnexanov Qazanğa kilgän Azärbaycan iq’tisad ministrı Mikail Cäbbarov belän oçraştı. Bu xaqta respublika citäkçeseneñ räsmi internet säxifäsendä yazıla. Mikail Cäbbarov ike cömhüriyät arasında säwdä-iq’tisadi, fänni-texnik häm mädäni xezmättäşlek buyınça Xökümätara komissiyä utırışında häm “Azärbaycan-Tatarstan” forumın açuda qatnaşu öçen kilde. Röstäm Miñnexanov beldergänçä, bu säfär ike aradağı mönäsäbätlärne nığıtuğa yärdäm itäçäk. “Qazanda Azärbaycannıñ general’ konsullığın açu turındağı täq’dimebezne qarawıbızğa şat bulırbız,”-dide Tatarstan räise.

Tatarstan – sport töbäge

Tatarstan Rusiyäneñ iñ yaxşı sport töbäge bularaq iğ’lan itelde. Tatar-inform mäğ’lümat agentlığı yazğança, älege isemlekkä kerüçelärne büläkläw Mäskäwdä yıl sayın uzdırıla torğan forumda ütte. Anda 2022nçe yıldağı iñ yaxşı sport ob’yektların häm töbäklärne bilgelilär. “Rusiyäneñ iñ yaxşı sport töbäge” kategoriyäsendä Tatarstan laureat buldı. İsemlektä, monnan tış, Kemerovo, Mäskäw häm ölkäse, Krasnodar häm Perm’ krayları bar.  

“Qazaqstan tawışı”nda tatar qızı

 Tatarstan başqalası Qazannan 11 yäş’lek cırçı Ralina İbrayeva “Qazaqstan tawışı. Balalar” proyektında qatnaşıp üzenä iğ’tibar cälep itte. Ğabdulla Tuqay süzlärenä icat itelgän xalıq cırı “Tuğan tel”ne başqarğan qızğa 4 ostaznıñ dürtese dä borılıp qarıy. Tatarstan mädäniyät ministrlığınıñ matbuğat üzäge beldergänçä, Ralina İbrayeva monnan alda da oxşaş proyektlarda qatnaşıp üzen tanıttırğan.