Tatarstan xäbärläre 27/2023

Röstäm Miñnexanov Tacikstanğa säfär yasadı

Tatarstan räise Röstäm Miñnexanov 2nçe martta Rusiyä delegaśiyäse sostavında Tacikstanğa räsmi säfär belän kitte. Anda ul ilbaşı İmamoli Raxmon belän oçraştı.  Miñnexanov älege küreşüdä töşkän fotoräsemne sośial’ mediada urtaqlaştı. 3nçe mart könne ul Düşänbedä xökümät başlığı Koxir Rosulzoda belän oçraştı. Anda ike arada xezmättäşlekne üsterü turında söyläśtelär. Ayırım alğanda, maşina tözeleşe, awıl xucalığı, sälamätlek saqlaw häm mäğ’lümatlaştıru ölkälärenä basım yasaldı.

Tatarstan däwlät citäkçeseneñ matbuğat xezmäte xäbär itkänçä, Röstäm Miñnexanov Tacikstanğa boralaqlar, yök maşinaları häm xäläl azıq-tölek satarğa äzer buluların belderde.

Tatarstan fermerlarına aşlıqların satarğa yärdäm kiräk

Tatarstan fermerları, krest’yan xucalıqları häm awıl xucalığı kooperativları berläşmäse citäkçese Kamiyar Baytemirov fermerlarnıñ saqlağıçlarında 6 milliard sumlıq aşlıqnıñ satılmıyça yatuın belderde. “Tatar-inform” mäğ’lümat agentlığı yazğança, älege aşlıq respublikada cıyılğan uñışnıñ yartısın diyärlek täşkil itä. “2022nçe yıl näticälärenä qarağanda, Tatarstanda berençe tapqır 1,3 million tonna uñış aldıq. 6 milliard sumlığı fermerlarnıñ ambarlarında qala. Aşlıqnı satudağı qıyınlıqlarnı respublika xakimiyäte xäl itärgä tiyeş,”-di Kamiyar Baytemirov.  

Toraq yortlar yanında ağulı qar

Tatarstannıñ Qaybıç rayonında ike zur qar çüplegendä xätär külämdä ağulı matdälär barlığı açıqlanğan. Êkologiyä häm tabiğat’ resursları ministrlığınıñ matbuğat xezmäte xäbär itkänçä, cirle xalıqnıñ şiqayät’lärennän soñ taşlandıq qarlarnı analizğa alalar.

5,5 meñ kvadrat metr mäydanğa tügelgän qarda xloridlar, neft’ produktları, sul’fatlar häm fosfatlarnıñ tiyeşledän bik küp tapqırlar artıq buluı açıqlana. Xäzer älege oçraqlar belän Qaybıç rayonı prokuraturası şöğıl’länä.

“Xäzinä”dä - Röstäm Kildebäkovnıñ kürgäzmäse

Tatarstan sınlı sänğat’ muzeyınıñ Qazan Kremlendäge filialı - “Xäzinä” galereyasında “Qazan avangardı. İkençe dulqın” śiklınnan dürtençe kürgäzmä açıldı. Ul “Tös formulası” dip atala häm 150gä yaqın xezmät tuplağan. Kürgäzmädä xäzerge zamannın iñ kürenekle tatar rässamnarınıñ berse - Röstäm Kildebäkovnıñ êşläre täq’dim itelä.  

Rässamğa 29nçı martta 89 yäş’ tula. Bu uñaydan anıñ zur yubiley kürgäzmäse kiläse yılğa planlaştırıla. Ä “Tös formulası” 4nçe aprel’gä qadär açıq bula.

Fän Wäliäxmätovqa - Tuqay premiyäse

Bötendön’ya tatar kongressı tanılğan sänğat’ êşleklese Fän Wäliäxmätovnı Tuqay isemendäge däwlät bülägenä täq’dim itte. Bu xaqta Kongress räise urınbasarı Mars Tuqayev üzeneñ sośial’ media akkauntında yazdı. “Ğomere buyı milätebezgä xezmät itkän, üzenä genä xas moñı, başqaru ostalığı, xalıqçanlığı, samimilege belän tatar-başqort tamaşaçısınıñ küñelen yawlağan Fän ağağa uñışlar telim”-di ul. Bilgele bulğança, laureatlar 26nçı aprel’dä iğ’lan iteläçäk. Cırçı häm garmunçı Fän Wäliäxmätov 2022nçe yılda 70 yäş’lek yubileyın bilgeläp ütte.