Sarı mätrüşkäneñ faydaları

     “Sälamät bulıyq” tapşıru tezmäbezneñ bügenge çığarılışında sarı mätrüşkäneñ faydaları xaqında süz alıp barabız.                                                                                                                           

Sarı mätrüşkäneñ faydaları 

Sarı mätrüşkäneñ çäçäklären cıyıp êşkärtep häm zäytün mayı belän quşu näticäsendä mätrüşkä mayı äzerlänä. Bu may yara êzlären tiz däwalaw öçen qullanıla. Qızıl mätrüşka mayı isä qızıl töstä bula.

Sarı mätrüşkä mayın niçek yasarğa?

Sarı mätrüşkä mayın äzerläw öçen iñ kiñ taralğan ısul tübändägeçä: 100 gramm yaña cıyılğan yäki kipterelgän mätrüşkä çäçägen ciñelçä izep pıyala bankığa salabız häm aña 250 gramm zäytün mayı östibez. Bu qatnaşma 30 kön däwamında qoyaşta qala. Anı waqıt –waqıt selekkäläp bolğatıp alırğa kiräk. Qatnaşmanı 30 könnan soñ sözärgä. Yaña cıyılğan mätrüşkä çäçäge qullanılsa may qızıl, kipkän çäçäklär qullanılsa may sarı bula. Ämma alar ikese dä ber ük törle täêsir itä.

Sarı mätrüşkä çäyen niçek äzerlärgä?

 1 stakan qaynar suğa yaqınça 2,5-3 çäy qaşığı kipkän sarı mätrüşkä salığız häm 10 minut tönätegez, annarı sözep êçegez. Çäyne yaña cıyılğan mätrüşkä üläne belän dä yasıy alasız.

Mätrüşkä çäyen qaynatırğa yaramıy, qaynar suda tönätü yaxşı.

Mätrüşkädan äzerlängän maynıñ faydaları

Mikrobial’ êffekt kürsätä

Bu may bakteriyälärne yäşäwdän tuqtata häm alarnıñ ürçüenä qomaçawlıy. Mondıy may yanğan urınnarnı däwalawda da näticäle.

Sarı mätrüşkä mayı yalqınsınuğa qarşı täêsirle

Ul infekśiya belän köräşä, viruslarğa, bakteriyälärgä häm gömbälägä qarşı êffektiv. Anı tiredäge bu mikroblar kiterep çığarğan infekśiyälär öçen qullanırğa mömkin. Ayaqlardağı gömbäne, çabırtqı häm tire yalqınsınuların däwalarğa yärdäm itä.

Yaranıñ tözälüen tizlätä

Sarı mätrüşkä mayı yaralarnı däwalawnı tizlätä, şul uq waqıtta bu may cepsel tuqımalarınıñ üzen artıq tözätüe näticäsendä barlıqqa kilgän fibroz tuqıması formalaşuın da totqarlıy.

Mätrüşkä mayın sıdırılğan häm yanğan urınnarda da qullanırğa bula.

Aşqaynatunı ciñeläytä

Aşqazanında cäräxät, gastrit, êç qatu häm gaz cıyılğanda sarı mätrüşkä çäye yärdäm itä. Ul aşqazanında kirtä barlıqqa kiterep aşqazanı kislotası täêsirlären kimetä, rizıqnı êşkärtü –señderüne ciñeläytä.

Depressiyäne däwalawda bulışa

 Klinik tikşerenülär sarı mätrüşkä çäyeneñ ciñelçä häm urtaça depressiyäne däwalawda näticäle buluın açıqladı.

Regulyar räweştä daru qullanuçılarğa başta psixiatr belän kiñäşläşergä kiräk.

Klimaks simptomnarn kimetergä mömkin

Sarı mätrüşkä çäye xatın - qızlarnıñ iñ awır çorlarınnan berse bulğan klimaks waqıtında şiqayät’lärne kimetergä yärdäm itä.

Mätrüşkä mayınıñ tiregä faydaları

Bu may qorı tire öçen bik faydalı, anıñ belän ayıruça  bik yış oçrıy torğan  söyällär häm ükçä yarıqlarna massaj yasarğa kiräk. 

Tireneñ sıyfatın yaxşırta

Sarı mätrüşkä mayı tirene dımlandıra, tireneñ qartayuına qarşı köräşä. Anı daimi qullanu tireneñ êlastiklığın arttıra, tire tonın tigezli.

Çäçlärne qoyıludan saqlıy

Sarı mätrşkä mayı bay komponentları belän çäçne häm çäç töplären tuqlandırğanğa kürä çäçlärne qoyıludan saqlıy. Çäçne nığıta häm qalınayta. Baş tiresendäge qawıq häm êkzemağa qarşı qullanırğa kiñäş itelä.

Sarı mätrüşkä çäye kofein, spirtlı êçemleklär häm tamäke bäyleleklären (addikśiya) däwalaw öçen dä qullanıla.

Mondıy çäy kürem awırtuları öçen da täq’dim itelä. Sarı mätrüşkä çäyen kürem könnärendä irtän häm kiçen cılı kileş êçärgä bula.

Bu çäy tönge yoqını köylärgä dä yärdäm itä. Yoqı probleması bulğannarğa yoqlar aldınnan sarı mätrüşkä çäyen êçärgä kiñäş itelä.

Sarı mätrüşkä mayın tiredä niçek qullanırğa?

Ul yaralarnı däwalawda, tire infekśiyälärendä häm êkzema kebek tire awırularında qullanıla.

Atnağa 1-2 tapqır çäçne qarawda qullanırğa bula. Çäçkä sörtep, baş tiresenä berniçä minut massaj yasarğa häm 30 minutqa qaldırırğa, annarı yuarğa kiräk.

Sarı mätrüşkä mayın qullanırğa yaramağan oçraqlar

Anı qullanğanda qoyaşqa çıqmasqa kiräk, ul ayıruça sizger tirele keşelärdä tireneñ yanu ixtimalın arttıra.

Sarı mätrüşkä mayın qullanğanda awırtu, tiredä reakśiyälär bulsa, yaralar tözälmasä anı qullanunı tuqtatıp belgeç tabibqa möräcağät’ itärgä kiräk.

Anıñ çäyen dä könenä 1-2 çınayaqtan artıq êçärgä yaramıy.

Sarı mätrüşkä mayın kemnär qullanmasqa tiyeş

Yöräk-qan tamırları awıruları, yökle häm imezüçe xatın –qızlar, böyer öste bizendä şeş bulğannarğa sarı mätrüşkä mayın qullanırğa yaramıy.

Ximioterapiya alğan keşelär häm organ küçerep utırtılğan keşelär dä bu maydan baş tartırğa tiyeş.

Sarı mätrüşkä çäye qayber preparatlar belän üzara bäyläneşkä kerä ala. Mondıy preparatlar: antibiotiklar, yöräk-qan tamırları sisteması häm nerv sisteması öçen darular. Sarı mätrüşkäne alar belän bergä qullanırğa yaramıy.

Avtor: tabib Mäxmät Uçar