MARAZ BİZGE RAHMET BOLGAN (7)

Maraz mü’minler üşün 

Aslında rahmet bolgan...  

Nav barede aytılgan  

Manelerdiñ bîr kesegin,

Burungıda aytqan edik;

Är bîrevi bîr dari    

Aqıyqatlardan qalgan   

Bazıları, nav bolgan:

Toguzunşı Dari;

Ey yaratuvşı Haq’tı    

Tanıgan avrıgan insan! 

Marazlardıñ qıyınlıgı, 

Em qorquvdıñ bîr sebebi,    

Marazlardıñ artından  

Bazı vaqıt ajel kelip 

İnsan ölgenge bolgan!

Nav ölümdiñ tıs beti, 

Gaplettiñ köstergen yagı, 

Dahşetli köringen sebep,  

‘Belki marazdıñ artı, 

Ölüm bolurma eken?’ dep  

Sosı maraz, insandı  

Qorqustup taleş bergen...

Avvel, bil, em berk iyman et!    

Ajel muqadder bolup

Vaqtı avıspay turgan... 

Allah qaysı zamanga 

Ölümdi yazgan bolsa,

Ajelimiz so vaqıt        

Sasırmay şıgıp kelgen...

Neşe köp avırgandıñ   

Baslarında yılaganlar,  

Savlıgı arüv bolganlar,

Özleri ölüp ozgan! 

Avır maraz bolganlar,     

Şifa tabıp yaşaganlar...

Ekinşi bîr aqıyqat: 

Ölüm tıstan köringendey  

Äş dahşetli bolmagan...

Qur’an-ı Hakim’den kelgen  

Savlemen ıspat etilgen,

Äş şüphe bolmagan  

Delil em manelermen    

İnsan qarap oylasa,   

Ehl-i iman üşün ölüm,  

Qullıq em qıyınlıqtan    

Bîr paydos, terhis bolgan...

Qabir artına ketken    

Yüzde toqsan toguz nispet

Süygenler em yuvıqlarga,  

Qavıspaga sebep bolgan...

Em aqıyqı vatanına,     

Tagı tatimlik yurtına   

Kirmege vasıta bolgan...   

Em dünya zındanından, 

Cennetbaqşalarına,

Quday’dan davet bolgan. 

Em maramatlı Allah’tıñ  

Pazlından, özi zatına    

Qullıq etkenlerge barı,

Qarşılıq em ücret üşün    

Bekletkeni yer bolgan...

Madem aqıyqat noqtasında,

Ölümdiñ asıl manesi,

Nav aqıyqat bolgan;

Qorqup dahşetke tüspey     

Rahmet em tetimliktiñ

Baslavuşı dep bilgeni,  

Bizlerge kerek bolgan.  

Ehlullahtan bazılardıñ, 

Veliy bolgan qullardıñ, 

Ölümden qorqqanları,

Dahşetinden bolmagan.  

‘Belki taga ziyada    

Qayır eter edik’ dep 

Oylagan sebep bolgan. 

Yaşavları tavsilmese,    

Taga köp qayırlar  

Etiyeklerini sengenge:  

‘Qayırlardan mahrum qaldıq.’  

Dep ölümden qorqqanlar...

İyye, ölüm mü’minge,   

Rahmet esigi bolgan...   

Yoldan sapqanlar üşün,  

Abediyyen qarangı 

Tüpsüz bîr quyu bolgan.

Onunşı Dari:  

Ey kereksiz yerge,

Marazından maraqlanıp,    

Oylanıp turgan insan!

Marazdı avır körüp  

Maraqlanıp turasın;   

Asıl, maraqın sebep 

Marazın avırlasqan...

Marazdıñ yengilligin   

Eger tilegen bolsan,     

Maraqtan erek tur!    

Marazban saga kelgen  

Payda, savabdı oyla! 

Em sosı marazdıñ    

Tezoq ötiyegin tüşün!

Maraqtı köterip at! 

Ene sosı yolmınan  

Maraz köki kesilgen!

İyye, maraq marazlardı, 

Eki qatqa şıgargan!

Bilgenimiz, marazlarga  

Maraqlanıp tursa insan,

Avrıganı qat qat bolgan...

So marazdıñ astında

Saqlangan bîr manevî  

Marazdı, qalpke salgan.

Maddî maraz soga tayanıp    

Tavsilmey davam qılgan...

Teslim bolup rızaman 

Avrıvdıñ hikmetin oylap

 Maraqtan qurtulsa insan,  

Sosı maddî avrıvdıñ

Köki kesilgen sebep, 

Marazı yengillesip   

Bîr kesegi ketip bargan...

Hatta sosı evhamman,   

Bîr direm maddî maraz, 

On diremge şıqqan...  

Eger maraq kesilse,

Marazdıñ ondan toguzı,

Ozaberip ketip bargan.

Maraq, marazdı artıq 

Qılgandıñ qasında, 

Haq’tıñ ullı hikmetini,

Red em inkär bolgan...  

Em ilahî rahmetti 

Begenmezlikke bargan.

Rahim bolgan Allah’tı, 

Şikayet etken sebep, 

Maksatınıñ tersimen

Tokat yep zarar körgen; 

Marazı artıq bolgan...

İyye, qay zaman bîr insan,   

Eger şükür etken bolsa,   

Nimetti artıq qılganday,   

Aynı sosı keppinen 

Şikayet, musibetti   

Taga zıyada qılgan...

Em maraqtıñ özi tagı 

Ayrı bîr maraz bolgan. 

So marazdıñ darisi,  

Marazlardıñ hikmetini,    

Em gayasını bilüv bolgan...

Madem hikmetini, paydasını,    

Nav aqıyqatlarman bildin!

Ol merhemdi, maraqqa   

Yagıp marazdan qurtul! 

‘Ah!’ yerine ‘oh!’ dep ayt!   

“Eyvah, yazıq, nav maraz,  

Qaydan keldi basıma!’ 

Degen sözdiñ ornında     

‘Elhamdülillahi ala külli hal’, 

‘Barı alge hamd bolsun!’   

Degen şükür sözini, 

Yüreginden kelip ayt!

Savlıqpan qalıñız!

Dr. Yusuf ALTINIŞIK

Nogayşa 02/2022: TEREKLER EM ÖSİMLİKTİÑ AYTQANI | TRT Tatarça

 

Nogayşa 01/2022: MAQAM-I MAHMUD EM PAYGAMBAR’GA SALAVAT | TRT Tatarça