Nogayşa 245: Qur’an deñizinden bȋr kesek aqıyqat (6)

Hikmet tolı Quran’dıñ     

Aqıyqatları deñiz bolgan...

Munşa alim ömürlerşe,

Aytıp turganları alde,

Qur’an’daqı aqıyqatlar, 

Äş tavsilip bolmagan...

Endi ol aqıyqatlardan   

Üykenşe bîr alimdiñ

Aytqanlarından bîr kesekti   

Taga sizge köşiremiz: 

‘Bismilllahirrahmanirrahim’ 

Dep sözge baslaymız:

Em Allah’tıñ Rasül’i 

Hazret-i Muhammed’ge   

Salat selam aytamız...

“Ey sıylı qardaşım,  

Nav aqıyqattı tagı bîl! 

İnsanlardıñ eñ üyken

Zulümlerinden bîrevi de  

Mine nav al bolgan...

‘Sosı al ne eken?’ desen,

Üyken bîr yamagattıñ

Qullıgıman qazanılgan

İygilikler, meyvalardı,

Yalgız bîr kisige berip   

Soga mal etediler;

Är kimdiñ qosulganı    

Bîr iygilikti, so yamagattıñ

Basındaqı adam etti,  

Dep soga berediler...

Basqa qullıq etkenlerdiñ  

Baresi mıtılıp,  

Sosınlar äş añılmay,    

‘Bari isti bastaqı     

Nav adem etti.’ dep   

Aytılsa em inanılsa,  

Bek üyken zulüm boladı!

Bîr insan nav keppen  

Eger oylagan bolsa,

Basqa qolı tiygenlerdiñ

Baresiniñ etkenine,  

‘Mine nav kisi etti!’dese,     

‘Yasırın şirk’ boladı...

‘Yasırın şirk’ degeni, 

Bîr üyken yamagatpan     

Anca etiliyek bîr zattı,

Bîr adem etti degende, 

Ol zaman so kisidiñ 

Sankim bîr Quday’day,  

Küşli, önerli bolganına,  

İtikat etilmis boladı. 

So kisidiñ öz küşiniñ  

Köp üstinde bîr quvat,  

So ademge beriledi...

Atta bazı so adamdı,   

Tapınıyaq darecede,  

Maqtavlarman biyik etip

Ullı maqam beriledi. 

Soga kömekşi bolgan 

Barı halqtın qullıgı,  

Äş bîr vaqıt añılmay 

Bîr so adem añıladı.  

Nav almen ol halqtıñ   

Haqları şiynenedi.   

Kimdiñ haqqı şiynense,  

Soga zulüm boladı...

Bîr yaqtan aldıdaqı,  

Bastutar ol adem,  

Özinin öz küşinden

Artıq qasiyetpen tanınganga;     

Özini maqtavşılardıñ  

Sözlerindey zannetip  

Üşünley ullı köredi!

Öpkesine yapısqan   

Bîr mikroppan bas etalmay  

Avrıp tüsken bîr adem,  

Özini üyken bilip   

Basqalardı tömende

Körgen vaqıt aslında,  

Özini masqara etedi! 

Mine sosı alminen 

Em tuvra yızgıdan,  

Em insanlıqtan şıgadı!    

Yahşi tabiyatlı insan bolsa, 

Bîr neşe is etse de  

Özini salpı köredi...

Yahşı qasiyet degenimiz  

Allerdiñ basında, 

Mine nav al keledi...

Tarihlerge qarasaq,  

Bazı halqlar özlerine  

Payda berip qullıq etken

Neşe biyik insanlardı,    

Maqtay maqtay sosınlardı,  

Soñında baslarına

Quday etip salganlar!

Atta eski Yunan’dıñ 

Em Veseni degen halqtıñ, 

Em bazı milletlerdiñ

Tapıngan  Quday’ları,  

Şaytan’dıñ ders bergeni  

Bılay zalım oymınan   

Ortalıqqa şıgıptı...

Bizler em halqımızga 

Üyken iygilik etken  

Batir bazı kisilerge, 

İygilikleri sebebimen  

Yalgız duva etsek boladı.  

Teşekkürden artıq ozıp    

So kisidi bek maqtasaq,

‘Mine nav iygilik,   

Sosı adem bolmasa,   

Äş etilmes edi!’ 

Dep barı iygilikti,     

Batir ademge berip

Kömekşilerdi mıtsaq,  

Biz tagı ‘yasırın   

Şirk’ke tüsüp Allah’tıñ

Razı bolmayagı oyga   

Tüsüp künager bolamız.”  

Biz endi Quday’ga     

Duva etip ‘nav künage 

Bizdi em tüsürme!’ dep   

Yürekten yalbaramız...

Savlıqpan qalıñız!  

Dr. Yusuf ALTINIŞIK

E-mail: altinisikyusuf@gmail.com

Nogayşa 244: Qur’an deñizinden bȋr kesek aqıyqat (5) | TRT Tatarça

 

Nogayşa 243: Qur’an deñizinden bȋr kesek aqıyqat (4) | TRT Tatarça

 

Nogayşa 242: Qur’an deñizinden bȋr kesek aqıyqat (3) | TRT Tatarça

 

Nogayşa 241: Qur’an deñizinden bȋr kesek aqıyqat (2) | TRT Tatarça

 

Nogayşa 240: Qur’an deñizinden bȋr kesek aqıyqat (1) | TRT Tatarça