Ğabdräşit İbrahim belän onıtılğan säxifälärne barlaw

Törkiyä başqalasında tanılğan tatar säyäsätçese häm din ähele Ğabdräşit İbrahim tormışı, äsärläre häm başqarğan êşçänlege belän iskä alındı.

2017nçe yılnıñ 7nçe mart sişämbe könne Änkara universitetında Tokio mäçete häm qolliyäseneñ 80 yıllığı mönäsäbäte belän ütkärelgän 4nçe Xalıqara Ğabdräşit İbrahim simpoziumı ütkärelde.

2017nçe yılnıñ 7nçe mart sişämbe könne Änkara universitetında Tokio mäçete häm qolliyäseneñ 80 yıllığı mönäsäbäte belän ütkärelgän 4nçe Xalıqara Ğabdräşit İbrahim simpoziumın Änkara universitetı qarşındağı Aziya-Tın okeanı êşçänlege ğamäli häm tikşerenü üzäge häm Törek-yapon êşmäkärläre cämğiyäte oyıştırdı.

Törkiyä, Tatarstan häm Yaponiyadan ğalimnär qatnaşqan xalıqara fänni cıyınnı Änkara universitetı rektorı professor doktor Ärkan İbiş açıp cibärde.

Simpoziumnıñ möhimlegenä iğtibarnı yünältüçe rektor çığışınnan soñ Yaponiyanıñ Törkiyädäge tulı wäqalätle ilçese Hiroşi Okağa süz birelde.

Ğabdräşit İbrahimnıñ bik möhim din ähele, ğalim häm cämäğät êşleklese buluına basım yasawçı Yaponiya ilçese Törkiyä belän Yaponiya arasında törle ölkälärdä üseş alğan yaqın häm tığız mönäsäbätlärgä iğtibarnı yünältte.

Simpoziumnıñ açılış öleşendä qatnaşqan Törkiyä Prem'yer-ministr urınbasarı professor doktor Numan Kurtulmuş isä, şuşı simpoziumnı oyıştırunı üzeneñ dä yaqlap çığuın assızıqlap, monnan soñğı yıllarda häm akademik, häm mädäni ölkädä Ğabdräşit İbrahim belän bäyle bik citdi êşçänlek alıp barılırğa däwam iteläçägen belderde.

 Ğabdräşit İbrahimneñ tormışı turında da mäğlümat birep uzuçı Premyer-ministr urınbasarı Kurtulmuş, anıñ yäşägän däwere belän bügenge çor arasında oxşaşlıqlarnıñ buluına basım yasap, dönyadağı İslamofobiya problemasına häm İslam dönyasındağı awırlıqlarğa iğtibarnı yünältte.

Ğabdräşit İbrahimneñ Tokioda urnaşqan käberenä dä baruın añlatuçı Numan Kurtulmuş Ğabdräşit İbrahim häm anıñ kebek şäxeslärneñ, İslam dönyasınıñ olı zatlarınıñ ul çaqlarda äytkännäreneñ bügenge İslam cämğiyätläreneñ uyanışı öçen dä möhim işarät taşları buluın belderde.

Professor, doktor Märtxan Dündarnıñ açılış konferenśiyasınnan soñ törek, yapon häm tatar ğalimnäre Ğabdräşit İbrahimneñ êşçänlege häm xezmätläre turında kiñ qırlı mäğlümat birep uzdı.

Ğabdräşit İbrahim  simpoziumın oyıştırğan Änkara universitetı qarşındağı Aziya-Tın okeanı êşçänlege ğamäli häm tikşerenü üzäge mödire Märtxan Dündar “Törkiyä awazı” radiosına birgän äñgämäsendä isä bıyıl dürtençese ütkärelgän Ğabdräşit İbrahim simpoziumınıñ berençesen Törkiyäneñ Konya şähärendä Yaponiya duslıq cämğiyäteneñ êlekke başlığı, märxüm Mäxmät Ali Arpacı belän bergä uzdıruların iskä töşerep, ul çaqta fänni cıyınnı oyıştıruda Konya şähär xakimiyäte häm Törek tarix cämğiyäteneñ yärdäm itüen belderde.

Ul çaqta berençe tapqır Ğabdräşit İbrahimneñ onıqları, balaları, anıñ belän bäyle êşçänlek alıp baruçı ğalimnärneñ cıyıluın assızıqlawçı Märtxan äfände fänni cıyınnıñ ikençeseneñ Tokioda, öçençeseneñ Tatarstan başqalası Qazanda ütkärelüen äytte.

Ğalim häm cämäğät êşleklese Ğabdräşit İbrahimneñ barı tik Törkiyä belän Rusiyä arasında häm Törkiyä belän Tatarstan arasında ğına tügel, Törkiyä belän Yaponiya häm Rusiyä belän Yaponiya arasında da möhim küper wazıyfasın başqaruın añlatuçı Märtxan Dündar şuşı ähämiyätle zatnıñ telgä alınğan illärneñ urtaq watandaşı, ildäşe buluına basım yasadı.

“Anıñ säyäxät itkän yullarınnan barıp, şuşı illär arasında duslıq bağlanışların köçäytergä häm üz tarixıbız belän bäyle onıtılğan mäğlümatlärne cıyarğa telibez”, - dip äytüçe Märtxan äfände monnan soñ çirattağı çaranıñ may ayında Tokioda ütkäreläçägen belderde häm annan soñğı maqsatlarınıñ törek-tatar yadqärlekläre saqlanğan Koreyada da fänni cıyın ütkärü buluın assızıqlap äytep uzdı.

Änkarada ütkärelgän 4nçe Xalıqara Ğabdräşit İbrahim simpoziumında Tatarstannan qatnaşqan Tatar ênsiklopediyası institutı mödire professor doktor İskändär Ğiläcev häm Şihabetdin Märcäni isemendäge tarix institutı professorı, doktor İldus Zahidullin belän şuşı fänni cıyında yasağan çığışları turında mäğlümat birep uzğan äñgämäne kiläse yazmada täqdim itärbez.