“Eurovision” cır bäygesendä İzrailgä protest

Finalı irtägä bulaçaq “Eurovision” cır bäygesendä İzrailneñ qatnaşuına Şveśiyäneñ Mal’mö şähärendä mennärçä keşe protest belderde.  

Böyek mäydanda cıyılğan xalıq konkursta İzrailgä boykot belderelüen teläde. Çarada qatnaşuçılar “Ğazzädä balalar üterelä”, “Genośidnı tuqtatığız”, “Fälästin mäñgegä” dip yazılğan plakatlar kütärde häm qullarına Ğazzädä üterelgän balalarnı simvollaştıruçı maketlar tottı. Alar “Fälästingä bäysezlek”, “Genośid başqaruçı İzrail”, “İzrailgä boykot” şiğar’läre qıçqırdı.  

Qatnaşuçılar irtägä tağın zur çara oyıştıraçaqların xäbär itte.

Bäygeneñ ikençe yarımfinalında säxnägä çıqqan izraille cırçı Êden Golanğa tamaşaçılar protest belderde. Ul cırın başqarğan waqıtta zalda “Bäysez Fälästin” dip qıçqırdılar.

Bel’giyäneñ “VRT” telekanalı isä “Eurovision” cır bäygeseneñ translyaśiyäsen bülep İzrailneñ keşe xoquqların häm matbuğat iregen bozuın ğayepläwçe, utnı tuqtatunı taläp itüçe yullama yasadı.  

Awrupa tapşırular berlegennän 2nçe mayda yasalğan belderüdä “Eurovision” cır bäygesenä çaqırıluçılarnıñ Fälästin bayrağı belän kertelmäyäçäge citkerelde.