Cır yarışında Fälästin simvolı
Şveśiyä cırçısı “Eurovision -2024” bäygesenä Fälästin yawlığı bäyläp çıqtı
Şveśiyädä 11nçe mayda uzaçaq “Eurovision -2024” cır bäygese qısalarında kiçä kiç oyıştırılğan berençe yarımfinal açılışında qatnaşuçı Êrik Saade säxnägä belägenä Fälästinneñ tradiśion yawlığı - küfiyä bäyläp çıqtı. Şulay itep, ul barlıq kisätülärgä qaramastan, yarışqa Fälästin tamğasın quydı. Äytergä kiräk - Şveśiyä isemennän çığış yasawçı cırçı üze dä Fälästin tamırlarına iyä. Ul 2011nçe yılda da çarada qatnaşqan ide. Ul çaqta “Popular” isemle cırı belän öçençe urınnı yawladı.
2003nçe yılda “Eurovision”da Törkiyägä berençelekne kitergän Särtab Äränär dä yıllar uzğaç qabat älege yarışnıñ säxnäsenä çığa. Ul açılış tantanasında “Everyway That I Can” (Min niçek tä buldıra alam) cırın başqardı.
“Eurovision” bäygese 7nçe tapqır Şveśiyädä uza. Axırğısı 2016nçı yılda bulğan ide. Şveśiyäneñ Fälästin törkeme monnan alda yasağan belderüendä İzrailneñ çarada qatnaşuına protest yasalaçağın citkerde.
