İran ilbaşı boralaq hälakätendä ülde

İran ilbaşı İbrahim Räisi boralaq hälakäte näticäsendä wafat buldı.

İran däwlät telekanalı xäbärenä qarağanda, İbrahim Räisi belän bergä boralaqta bulğan tışqı êşlär ministrı Xösäyen Ämir Abdullaxiyan belän Könçığış Azärbaycan töbäge gubernatorı Mälik Raxmäti häm Täbriz comğa imamı Ayätulla Ali Xaşim da hälaq buldı.

Törkiyädän kitkän “Akıncı” keşesez hawa apparatınıñ êşçänlege näticäsendä boralaqnıñ cimerekläre tabıldı. Anda İnqıylab saqçıları armiyäseneñ yuğarı däräcäle 2 xärbi wäqalätlese belän 3 êkipaj äğ’zasınıñ da ülüe açıqlandı.   

Kiçä İrän däwlät başlığı İbrahim Räise häm Azärbaycan ilbaşı İlham Äliyev qatnaşında ike il çigendä böyä açu tantanası uzdı. Annan qaytışlıy İran delegaśiyäseneñ boralağı, naçar hawa şartları säbäple, kisken räweştä töşep utırırğa mäcbür qala.  

63 yäş’lek İbrahim Räisi 2021nçe yılğı saylawlarda berençe turda ciñep İrannıñ 8nçe ilbaşı buldı. Xösäyen Ämir Abdullaxiyan isä şul uq yıldan birle tışqı êşlär ministrı ide.

İlneñ dini liderı Ali Xamaney idarä öçen ilbaşı urınbasarı Möxämmät Möxbirneñ cawaplı bulaçağın belderde häm 5 könlek milli matäm iğ’lan itelüen citkerde.