Awrupa Berlege Fälästin mäs’äläsendä bülende

Awrupa Berlege tışqı mönäsäbätlär häm iminlek säyäsäte yuğarı wäkile Djozef Borrell Ukraina-Rusiyä suğışında berdäm xäräkät itkän äğ’za däwlätlärneñ Fälästin mäs’äläsenä kilgändä bik nıq bülenüen äytte. Ul AQŞnıñ Stênford universitetınıñ Gover institutındağı çığışında Ğazzä sızığındağı wäzğıyät’kä tuqtaldı.

Borrel fikerençä, Fälästin idaräseneñ nığıtıluı öçen säyäsi prośess başlaw möhim. “Bu faciğadan çığunıñ berdänber yulınıñ - ike däwlätle çişeleşkä ireşü buluın qıçqırıp häm açıq itep äytergä kiräk. Niqadär awır bulsa da, keşelek vöcdanında tap bulıp qalaçaq bu faciğanı tuqtatunıñ başqa yulın kürmim”,-dip söyläde Borrell.

Ul Awrupanıñ Fälästin mäs’äläsendä bik bülenüenä dä tuqtaldı. “Qayber oçraqlardan qala, Awrupa Berlege illäre Rusiyägä qarşı berläşte. Ukrainanı säyäsi, iq’tisadi, här yaqtan yaqlaw mäs’äläsendä berdäm buldılar. Ğazzä mäs’äläsendä bik nıq bülendek”,-dip söyläde Borrell. Ul ike däwlätle çişeleşne mömkin itü öçen Awrupa Berlegeneñ cawaplılıq aluın häm ğaräp xezmättäşlär belän söyläşülärneñ däwam itüen belderde. “AQŞ yağındağılarnıñ isä çişeleş êzli-êzli xäldän tayuların küräm” -dip tänqıyt’läde räsmi zat.