"İzrailgä qoral satmağız"

Awrupa Berlegeneñ tışqı mönäsäbätlär häm iminlek säyäsäte yuğarı wäkile Djozef Borrell İzrailgä qoral satmasqa çaqırdı. Ul İspaniyä tışqı êşlär ministrı Xose Manuêl’ Albares belän Madridta oçraşır aldınnan matbuğat äherllärenä belderülär yasadı.  

Borrell Amerika Quşma Ştatlarınıñ İzrailgä qoral täêminatın tuqtatu qararı belän bäyle sorawğa: “Bombalawnı tuqtatunıñ berdänber yulı - bomba birmäw”,-dip cawap birde.  Ul Ğazzä öçen xäräkätkä küçmägän Awrupa Berlege liderlarına da rizasızlıq belderde: “Qayber awrupalı wazıyfadaşlarıbız “Ğazzädä artıq küp ülem bar, bik qızğanıç!” digändä şunı sorarğa kiräk: Niçä keşe artıq? Tağın da kübräk bulmawı öçen adım yasağançı 50 meñ keşeneñ ülüen kötärgäme?” - dide Borrell.

Qayber Awrupa Berlege illäreneñ Fälästin däwläten tanırğa cıyınuına nisbätle ul bolay dide: “Ägär berniçä il bu adımnı yasasa, alarğa tağın da kübräge iyäräçägenä ışanam. Yaqın Könçığışta ike däwlätle çişeleşkä çınlap ta ışanuçılarnıñ bu mäs’älädä söyläşüdän arı kitüläre yaxşı”.  

İspaniyä citäklägän häm lobbi êşçänleklären alıp barğan Fälästin däwläten tanu iniśiativasın İrlandiya, Sloveniya, Mal’ta häm Norvegiyä yaqlıy.