Şifa xastaxanäsendä tabılğan öçençe kümäk qaberlek

Ğazzä şähärendä İzrail armiyäse basqın yasağan Şifa xastaxanäsendä tabılğan öçençe kümäk qaberlektän 49 fälästinleneñ mäyete çığarıldı. Bu xaqta Ğazzädäge xökümätneñ media xezmäte xäbär itte. Anda İzrail ğaskärläreneñ bik küp fälästinlene qulğa aluı häm yuqqa çığaruına iğ’tibar cälep itelä. “Êşçänleklär tögällänmäde häm yaña distälärçä mäyetneñ çığarıluın kötäbez” diyelä xökümät belderüendä.

Ğazzä sızığında İzrail armiyäse basqın yasağan xastaxanälärdä tabılğan kümäk qaberlek sanı 7gä citte. Alardan xäzergä qadär 520 fälästinleneñ üle gäwdäse çığarıldı. Xökümät kümäk qaberleklär häm keşelekkä qarata êşlänüçe cinayät’lär öçen AQŞ idaräse, xalıqara cämäğat’çelek häm İzrailne cawaplı itep kürsätä. “İzrailgä keşelekkä qarşı êşlänüçe bu cinayät’lären AQŞnıñ tulı yärdäme belän däwam itärgä röxsät birelä” diyelä belderüdä.

İzrail armiyäse Ğazzä şähäreneñ könbatışında 7 meñnän artıq awıru häm yäşägän cirennän quılğan fälästinle sıyınğan Şifa xastaxanäsenä 18nçe martnıñ täwge säğat’lärendä basqın oyıştırdı. Ğazzädäge xökümät anda 400dän artıq fälästinleneñ üterelüen, 900läbeneñ qulğa alınuın citkerde.  İzrail armiyäse isä 2 atna däwam itkän basqında 200 keşeneñ ülüen, 500dän kübrägeneñ qulğa alınuın beldergän ide.