"Mäxkämägä qarata yanawlarnı ğayeplim"

Awrupa Berlege tışqı mönäsäbätlär häm iminlek säyäsäte yuğarı wäkile Djozef Borrell utnı tuqtatu mäs’äläsendä kileşügä barılmawına qayğıruın belderde. Ul İzrail armiyäseneñ Ğazzädäge Räfax töbägenä cirdän höcüm başlawı turında bolay dide: “Xalıqara cämäğat’çelekneñ, Amerika Quşma Ştatlarınıñ, Awrupa däwlätläreneñ, härkemneñ Netan’yaxudan Räfaxqa höcüm itmäwen sorawına qaramastan, cirdän xäräkät başlandı. Bu qabat bik küp tınıç xalıq ülemenä kiteräçäk dip qurqam. Ğazzädä 600 meñ bala bar. Yänäse imin urınnarğa iltäçäklär. Ğazzädä imin urın digän närsä yuq”.

Borrell’ Xalıqara mäxkämäneñ Ğazzädäge xällär turında irtäme-soñmı närsäder söylärgä tiyeş bulaçağın äytte. “Mäxkämägä qarata här törle yanawlarnı ğayeplim. Citär”,-dide ul.

Bilgele bulğança, Xalıqara mäxkämäneñ Netan’yaxu häm İzrailneñ başqa yuğarı däräcäle wäqalätlelärenä qarata saq astına alu qararı çığara aluı äytelde. Xäbärlärdä AQŞnıñ Xalıqara mäxkämäneñ räisläre belän êlemtä kerüe häm izraille wäqalätlelärgä qarata mondıy qarar çığarmasqa quşuı turında yazdılar.