Tön’yaq Koreya ballistik raketalar cibärde

Tön’yaq Koreya Yaponiyä diñgezendä balistik raketa sınawları uzdırdı.

Yaponiyä saqlanu ministrlığınnan xäbär itülärençä, raketalar cirle waqıt belän säğat’ 06.59da häm 07.10da cibärelä. Alar Yaponiyä iq’tisadi zonası tışına töşä häm töbäktä xäräkät itüçe ob’yektlarğa zarar birmi. Xökümät räise Kisida Fumio BMO İminlek şurasın Tön’yaq Koreyanıñ sınawları nisbätennän cıyılırğa çaqıruların belderde.

Ballistik raketa sınawlarınnan soñ Tokio xökümäte, Yaponiyäneñ Pekin ilçelege yärdämendä, Tön’yaq Koreya idaräsenä protest citkerde.

Kön’yaq Koreya ğomumştab citäkçelege dä raketalarnıñ Sukçon cirlegennän oçırtıluın xäbär itte. Alarnıñ berse 390, ikençese 340 çaqrımğa oçqan.

Tön’yaq Koreya 2022nçe yılda 37 sınawda törle tip häm yıraqlıqtağı yaqınça 90 raketasın attı. Bu oçraq 2023nçe yıl başınnan birle 3nçe sınaw bularaq terkälde.