Qaçqan ilbaşı urınına yañası saylandı

Şri-Lankada waqıtlıça däwlät başlığı häm xökümät räise Ranil Vikremesingxe ilbaşı bularaq saylandı. İq’tisadi häm säyäsi krizistağı däwlätneñ 225 äğ’zalı parlamentında uzğan yäşeren tawış birüdä yaña lidernıñ iseme bilgelände. Êlekkege ilbaşı Gotabaya Rajapaksa xökümätkä qarşı protestlardan soñ ildän qaçtı häm 14nçe iyül’dä êlektron poçta aşa wazıyfasınnan kitüen belderde.

Yäşeren tawış birüdä Vikremesingxe 82 qarşı häm 134 uñay tawış belän saylandı. Ul wazıyfa waqıtı 2024tä betärgä tiyeş bulğan Rajapaksanıñ qalğan 2 yılı buyınça ilne citäkläyäçäk.

Vikremesingxe 1999nçı häm 2005nçe yıllarda däwlät başlığı saylawlarında kandidat buldı, tik saylana almadı.