Nexammer Mäskäwdäge oçraşuı turında söyläde
Ul Rusiyä däwlät başlığı belän söyläşüen "qırıs häm açıqtan-açıq" dip bäyäläde
Awstriyä kanślerı Karl Nexammer Mäskäwdä Rusiyä däwlät başlığı Vladimir Putin belän oçraşqannan soñ matbuğatqa belderülär yasadı. Ul söyläşüneñ, ğomumän alğanda, bik uñay ütmäwen, tik dialognıñ baruı häm êlemtälärneñ däwam itüe xaqına bu kereşüneñ ähämiyätle buluın citkerde.
Karl Nexammer Ukraina däwlät başlığı Volodimir Zelenskiy belän bergä oçraşu täq’dimenä Putinnıñ bernindi reakśiyä kürsätmäwen äytte. Ul Rusiyä ilbaşınıñ 29nçı martta İstanbulda başlanğan häm tuqtatılıp toruçı söyläşülärneñ däwam itüe yaqlı buluın citkerde. “İstanbuldağı söyläşülärgä äle haman ışana. Bu mäs’älädä Törkiyä ilbaşı Räcäp Tayyip Ärdoğan belän fiker alışaçaq,”-dide Karl Nexammer.
Awstriyä kanślerı suğış başlanğannan birle Vladimir Putin belän oçraşqan awrupalı täwge xökümät başlığı buldı.
