Boris Djonson: "Êşlär tağın da naçarayaçaq"

Angliya xökümäte räise Boris Djonson watandaşlarnıñ öylärenä xatlar cibärep, êşlärneñ tağın da naçarayaçağın belderäçäk.

Ministrlar kabinetınnan yasalğan belderügä qarağanda, koronavirus testı pozitiv çıqqan prem’yernıñ xatı 4 atna êçendä 30 million yortqa barıp citäçäk.

Djonson xatında xalıqnı öydä torıp milli sälamätlek saqlaw xezmätlären saqlarğa häm ğomerlärne qotqarırğa çaqıraçaq. Monnan tış, ul xökümätneñ kizü belän köräşü, êş cirläre häm xezmätkärlärgä yärdäm itü maqsatı belän ğamälgä kertkän çaraların da añlataçaq.

Prem’yer-ministr xatında iñ başınnan birle döres waqıtta tögäl çaralar kürergä tırışuların, kiräk bulsa, alarnı tağın da qatğıylaştıraçağın belderä. “Sezneñ belän açıqtan-açıq söyläşäm. Êşlär yaxşırğanğa qadär tağın da naçarayaçaq,”-di ul.

Şul uq waqıtta, Britaniya milli mediśina direktorı, professor Stiven Pouis ildä ülemnärneñ 20 meñnän kim qaluınıñ “yaxşı näticä” bulaçağın belderde. Ul xalıqnı üz öslärenä töşkänne êşlärgä häm xökümätneñ kisätülären iğ’tibarğa alırğa çaqırdı.

Angliyä xäzergä qadär koronavirusta 1019 qorban birde. İldä öleşçä karantin qararı häm başqa çaralarnıñ täêsire kürengänçe terkälgän oçraqlar häm ülemnärneñ kiläçäk 2-3 atna buyınça artaçağın kötälär.

Baştaraq Angliyä xökümäte sośial’ immunitet buldıru maqsatı belän virusnıñ kontrol’ astında taraluı strategiyäse alıp barğan ide. Ämma ülüçelärneñ 277 meñgä citäçäge turındağı xisaplar häm tänqıyt’läwlärdän soñ bu yuldan waz kiçtelär.

Uzğan düşämbe könne xalıqnıñ öydän çığuına çikläwlär kertelde, azıq-tölek kibete häm daruxanälär tışında barlıq kommerśiyä urınnarı yabıldı.

25nçe martta Angliyä täxete varisı, Uêl’s prinśı Çarl’z, 27nçe martta xökümät räise Boris Djonson belän sälamätlek saqlaw ministrı Mêtt Xênkoknıñ Kovid-19 testları pozitiv çıqtı. Öçese dä awırularınıñ ciñelçä uzuın belderde.