Tağın ber fälästinle şähit buldı

Gazzä – İzrail’ çigendä däwam itüçe “Böyek qaytu yöreşe” waqıtında yaralanğan tağın ber fälästinleneñ ülüe bilgele buldı.  Bu xaqta Fälästin sälamätlek saqlaw ministrlığı süzçese Äşräf äl-Kudra xäbär itte.  20 yäş’lek Abdullax Möxämmät Şimalinı comğa könne İzrail’ xärbiye yaralağan ide. Şulay itep, 30nçı marttan birle uzuçı “Böyek qaytu yöreşe”ndä şähit buluçılrnıñ sanı 40qa citte.

İzrail’ xökümäte 1976nçı yılnıñ 30nçı martında ilneñ tön’yağında yäşäwçe fälästinlelärneñ meñnärçä gektar cirlären tartıp aldı. Fälästin xalqı moña rizasızlıq belderep êş taşladı häm demonstraśiyälärgä çıqtı. İzrail’ poliśiyası alarğa ut açtı. 6 keşe hälaq buldı, küp sanda yaralanuçılar bar ide. Bu waqıyğa “Cir köne” bularaq iskä alına häm fälästinlelärneñ cir öçen kürsätkän qarşılıqlarınıñ simvolı bularaq qabul itelä.