د افغانستان او پاکستان په پوله کې نښته دوام لري

د افغانستان  او پاکستان په پوله کې  د افغان او پاکستاني  ځواکونو ترمنځه نښته وشوه.

د افغانستان د کندهار ولایت  د رسنیو او معلوماتو مرکز لخوا پدې اړه په خپره شوې خبرپاڼه کې ویل شوي دي چې « نن جمعه د مې پنځمه د سهار په ۳ بجو او ۴۵ دقیقو  د سپین بولدک  د لقمان او نظر په سیمو کې چې د پاکستان سره  د پولې په صفري  نقطه کې قرار لري  ځینو پاکستاني ملیشو  غوښتل چې  افغانستان لوري ته  راتیر شي چې افغان پوله ساتو يي مخه ونیوله. »

په خبرپاڼه کې راغلي دي چې  وروسته نښته پیل شوه چې  دواړو خواوو ته پکې  ځاني زیانونه اوښتي دي.

د خبرپاڼې له مخې افغان ځواکونو  په سیمه کې د میشتو ملکي وګړو  خوندیتوب په خاطر  په عملیاتو لاس پورې کړی دی .

د بله پلوه  پاکستان بیا ادعا کړې ده چې  افغان پوله ساتو په چمن کې  ددوې  په امنیتي پوستو  بریدونه کړي  دي.

پاکستان  پلو  پدې برید او نښته کې  د یو تن د وژل کیدو او ۱۷ تنو نورو د ټپي کیدو نه خبر ورکړی دی.

د افغانستان لورې بیا تر اوسه پورې  افغان پوله ساتو ته د اوښتي ځاني زیان په اړه څه ندي ویلي.

د بله پلوه د سیمې نه  د ترلاسه شوو  معلوماتو له مخې نښته اوس هم  دوام لري او خال خال د ډزو غږ اوریدل کیږي.

د بله پلوه  د پاکستان د پوځ ویاند  جنرال اصف غفوري  ویلي دي چې  افغانستان پوله ساتو ځواکونو  د پاکستان  د سر شمیرنې په ډلې  ډزې کړي دي چې  دا ډیره  د خواشینۍ  ځای  دی.

هغه ویلي دي چې  پدې پیښه کې  یو تن مړ او د سرشمیرنې د ډلې  د ۴ تنو په ګډون  ۱۸ تنه  نور ټپیان شوي دي. هغه ویلي دي چې  پاکستان افغان مقاماتو ته د سرشمیرنې په اړه  معلومات ورکړي وو  خو د هغه  سره سره  دا پيښه رامنځته شوې ده .

ویاند ویلي دي چ نښته  دوام لري  چې د همدې امله  پاکستان د چمن سرحدي دروازه  تړلې ده .