Жевдет Йылмаздын Акынжы тууралуу бөлүшүүсү

Вице-президент Жевдет Йылмаз: «Өнүккөн технологиялык коргонуу өнөр жай өнүмдөрү менен муктаж болгон өлкөлөргө берилген колдоо эл аралык абалыбызга жана карым-катнашыбызга оң таасирин тийгизүүдө»,-деди.

Вице-президент Йылмаз, социалдык медиа эсебинен билдирүүсүндө, Байрактар ​​АКЫНЖЫ чабуулчу учкучсуз учуучу аппаратынын Ирандагы трагедиялуу тик учак кырсыгынан кийинки көрсөткөн ийгилиги жана Түркиянын коргонуу өнөр жайында жетишкен ийгиликтери өлкөнүн коопсуздугун чыңдоо менен бирге социалдык-экономикалык өнүгүүгө кошкон зор салымын да көрсөткөнүн билдирди.

Вице-президент Йылмаз өз билдирүүсүндө төмөнкүлөргө токтолду: «Коргонуу өнөр жайында жетишилген ийгиликтер жарандык аймактарга да жайылууда, жогорку кошумча нарктуу экономикалык өндүрүштү жана экспортту колдоп, элибиздин жыргалчылыгына салым кошууда. Социалдык жана экологиялык керектөөлөрдү (жер титирөө жана өрт сыяктуу) натыйжалуу канааттандырууга багытталган практикалар туруктуу жана адамдарга багытталган өнүгүүнү бекемдейт. Алдыңкы технологиялык коргонуу өнөр жай өнүмдөрү менен муктаж болгон өлкөлөргө берилген колдоо да эл аралык позициябызга жана карым-катнашыбызга оң таасирин тийгизүүдө.

Бардык бул тармактарда алдыңкы иштерди аткарган Селчук Байрактар ​​мырзаны жана анын командасын сүйүктүү улутубуздун атынан дагы бир жолу куттуктайбыз»,-деди.

Бир күн мурда Ирандын президенти Ибрахим Реиси Иран-Азербайжан чек арасындагы дамбанын ачылыш аземине катышкандан кийин тышкы иштер министри Хусейн Эмир Абдуллахиян жана кээ бир жетекчилер менен бирге тик учак кырсыгына кабылды.

Түркия Ирандын талабы боюнча Акынжы учкучсуз учуучу аппаратын издөө-куткаруу иш-чаралары үчүн дайындады. Акынжы учкучсуз учуучу аппараты тарабынан аныкталган тик учактын калдыктарынын координаттары Иран бийлиги менен бөлүшүлдү.

Ирандык командалар белгиленген жерге жетип, кырсыктан аман калгандар жок экенин аныкташты.