თურქული პრესა 18.08.2023

თურქული პრესა 18.08.2023

თურქული პრესის მოკლე მიმოხილვა

Hürriyet: „გერმანულმა გაზეთმა მსოფლიოს უთხრა: თურქეთი მოქმედებაშია“

მას შემდეგ, რაც რუსეთმა გამოაცხადა, რომ არ გააგრძელებს მარცვლეულის შეთანხმებას, რომელიც უკრაინის სოფლის მეურნეობის პროდუქტებს მსოფლიო ბაზრებზე გასვლის საშუალებას აძლევს, გერმანულმა გაზეთმა Frankfurter Rundschau-მ ყურადღება გაამახვილა თურქეთის პოზიციაზე ამ ბალანსში. გერმანული გაზეთი წერს, რომ თურქეთი აგრძელებს მოლაპარაკებებს როგორც დასავლეთთან, ასევე რუსეთთან.

Star: "საყურადღებო აღიარება: აშშ ყოყმანობს თურქეთთან დაპირისპირებაზე"

ამერიკული ჟურნალი Foreign Affairs წერს, რომ ამერიკის შეერთებულ შტატებს მოუწევს დაელაპარაკოს პრეზიდენტ რეჯეფ თაიფ ერდოღანს. ჟურნალში ნათქვამია: „თურქეთი ფასდაუდებელი მოკავშირეა მისი გეოპოლიტიკური და სამხედრო მნიშვნელობისა და ეკონომიკური პოტენციალის წყალობით. აშშ ყოყმანობს თურქეთთან დაპირისპირებაზე, რადგან მას არ სურს კონფლიქტის გამწვავება“.

Yeni Şafak: "ქება თურქეთის ჯანდაცვის სისტემას"

არაბეთის გაერთიანებული საამიროების ელჩმა ანკარაში, საიდ სანი ეზ-ზაჰირიმ  განაცხადა, რომ თურქეთს აქვს ძალიან მოწინავე და განვითარებული ჯანდაცვის სისტემა. „ტურისტული მიზნებისთვის ჩამოსული 140 000 ადამიანიდან ნაწილი თურქეთში ჩადის ჯანდაცვის ტურიზმისა და სამედიცინო დახმარებისთვის“. - თქვა ზაჰირიმ.

Haber Türk: "თურქეთში უმუშევრობის დონე შემცირდა"

თურქეთში უმუშევრობის დონემ წლის მეორე კვარტალში 9,7 პროცენტი შეადგინა, რაც წინა კვარტალთან შედარებით 0,3 პუნქტით ნაკლებია. დასაქმებულთა რაოდენობა 2023 წლის მეორე კვარტალში წინა კვარტალთან შედარებით 151 ათასი ადამიანით გაიზარდა და 31 მილიონ 513 ათასი გახდა, ხოლო დასაქმების მაჩვენებელი 0,1 პუნქტით გაიზარდა და 48,2 პროცენტი შეადგინა.

Vatan: "თურქული ეკონომიკა გააგრძელებს ზრდას"

ხაზინისა და ფინანსთა მინისტრმა მეჰმედ შიმშექმა განაცხადა, რომ მიუხედავად ყველა პრობლემური ფინანსური მდგომარეობისა 2023 წელს, ისინი ვარაუდობენ თურქეთის ეკონომიკის დაახლოებით 4,5 პროცენტიან ზრდას. მომავალი 5 წლის განმავლობაში გლობალური ზრდა მოსალოდნელია დაახლოებით 3%-ით.