Mənşəyi bilinməyən hepatit əsasən Avropa ölkələrində görünməkdədir

 İngiltərədə ortaya çıxan və qısa müddətdə 12 ölkədə görünən mənşəyi məlum olmayan hepatit virusunun aşkarlandığı uşaqların sayı 190-a yüksəlib.

  Avropa Xəstəliklərin Qarşısının Alınması və Nəzarəti Mərkəzinin (ECDC) direktoru Andrea Ammon son həftələr artan hepatit halları ilə bağlı deyib: “Mənşəyi bilinməyən hepatit virusuna yoluxan uşaqların sayı dünya üzrə 190-a yüksəlib ki, bunun 140-ı Avropa ölkələrindədir. Yoluxma halları bir-biri ilə əlaqəli deyil, yəni beynəlxalq səyahətlərdən qaynaqlanmır.

  Hepatit hallarının “Covid-19” və ya adenovirus ilə əlaqəsi olub-olmadığı aydınlaşdırılır.

  ECDC aprelin 28-də bu məsələ ilə bağlı risk qiymətləndirməsi hesabatını paylaşacaq.

  İlk dəfə 5 və 8 aprel tarixlərində İngiltərədə ortaya çıxan və aprelin 21-dən 11 ölkədə görünən hepatit virusu sonuncu dəfə ayın 26-da Yaponiyada bir uşaqda aşkarlanıb”.

  Qeyd edək ki, Ümumdünya Səhiyyə Təşkilatı aprelin 16-da verdiyi yazılı məlumatda İngiltərədə 74 uşaqda mənşəyi bilinməyən hepatit virusu aşkar edildyini açıqlamışdı. Aprelin 25-ində verilən məlumatda isə virusun 11 ölkəyə yayıldığı və ən azı 169 yoluxma halı qeyd olunduğu bildirilib.