تورکیه نینگ تاریخی قونیه شهری حقیده قیسقه معلومات

قونیه, تاریخی و فرهنگی جهت دن آلیب قره گنده تورکیه نینگ اینگ مهم شهر لریدن بیری نی تشکیل ایتماقده. 

تورک اسلام عالمی نینگ اینگ مهم متفکر لری دن بیری بولگن مولانا جلال الدین محمد بلخی رومی نینگ اسمی بیلن بیرگه یاد ایتیلیاتگن اوشبو شهر, بای بیر تاریخی اوتمیش گه ایگه.  اوشبو منطقه ده انسان لرنینگ میلاد دن آلدین 9000 – ییلده یشب باشله گن لیک لری اویلنماقده. 

شهر نینگ مرکزی گه یقین بیر نقطه ده جایلشگن چاتال هویوک نینگ, حاضرگی کون گه قدر کشف قیلینگن اینگ قدیمی و رواجلنگن نیولیتیک مسکونی مرکز دن عبارت ایکن لیگی بیلینماقده.  جهان بویلب بیرینچی مرته طعام فرهنگی نینگ باشله گن, ایکینچیلیک قیلینگن, آتش دن فایده له نیلگن, مسکونی حیات نینگ باشله گن و وحشی حیوان لردن قورینیش اوچون اورتاق مدافعه نینگ عملی قیلینگن بیر مرکز اوله راق بیلینماقده چاتال هویوک. 

میلاد دن آلدین قونیه ده, هیتیت لر, فریگ لر, لیدیالیک لر, پرس لر و مقدونیه لیک لر نینگ حاکم بولگن لیک لری بیلدیریلماقده.  کیین چه لیک ایسه روم لیک لر بیلن عرب لر حاکمیت قیلگن اوشبو جغرافیه ده.  تورک لرنینگ اناطولی جغرافیه سی گه کیلیشی بیلن بیرگه, آلدین سلجوقی کیین چه لیک ایسه عثمانی دولتی تامانیدن باشقریلگن قونیه. 

حاضرگی کونده قونیه ده خوددی شوو مدنیت لرنینگ قالدیق لری نینگ موجود ایکن لیگی کورینماقده.  حتی میلاد دن آلدین 3500 - ییل گه عاید مقدس جای لرنینگ قالدیق لری نی هم کوریشینگیز ممکن قونیه ده. عینی دمده اناطولی ده گی اینگ قدیمی مسیحی مسکونی نقطه لر و اینگ ایسکی کلیسا لرنی هم اوشبو جغرافیه ده تاپیش ممکن. 

سلجوقی دولتی نینگ پایتختی بولگن قونیه, عینی دمده ایپک یولیده گی اینگ مهم تجارت مرکزی دن هم عبارت بولیب کیلگن.  اسلام مدنیتی نینگ یوزلب اثری نینگ موجود بولگن و اوشه دور نینگ اینگ مهم عالم لری نینگ ییتیشگن بیر شهر دن عبارت قونیه. 

قونیه ده, اناطولی سلجوقی دولتی نی باشقرگن پادشاه لر, وزیر لر و تاریخی شخصیت لرنینگ قبر لری موجود.  عینی دمده کوپلب تاریخی مسجد لر و مدرسه لر نی هم کوریش ممکن اوشبو شهرده.    

اون اوچینچی عصر نینگ اینگ مهم شاعر, عالم و متصوف لریدن بیری بولگن مولانا جلال الدین رومی بلخی خوددی شوو ییر نینگ اوزیده ایجاد قیلیب وفات ایتگن. اوشبو اسلام عالمی نینگ قبری هم خوددی شوو شهرده اورین آلگن وضعیتده. 

وفاتی دن یوزلب ییل اوتگن بولیشی گه قره مسدن, مولانا نینگ مفکوره سی حاضرگی کونده هم دنیا بویلب انسان لر تامانیدن اوقیلرایکن, اثر لری نینگ ایسه اونلب تیلگه ترجمه قیلینگن کورینماقده.  اوشبو جهت دن آلیب قره گنده تورکیه نینگ قونیه شهریده جایلشگن مولانا نینگ قبری و موزیمی اوزی گه خاص اهمیت گه ایگه.  مولانا درگاهی نی هم قمره گن موزیمده, درویش لرنینگ یشه گن جای لری, سما رقصی نینگ اجرا قیلینگن مرکز, عُرس کیچه سی حوضی, مولانا و مولی لیککه عاید اثر لر بیلن قول یازمه کتاب لر, چراغ لر, موسیقی آلت لری و مسجد نی کوریشینگیز ممکن.

مولانا موزیمیده بیر کتابخانه هم موجود.  خوددی شوو کتابخانه ده سلجوقی, قره مان اوغیل لری و عثمانی دولتی دور لری گه عاید تورت مینگ دن آرتیق قول یازمه اثر نینگ موجود ایکن لیگی بیلینماقده.  اوشبو اثر لر دیجیتال بیر وضعیت گه کیتیریلیب محقق لر گه تقدیم ایتیلگن وضعیتده. 

قونیه, مسجد لر, سرای لر و مدرسه لر شهریدن عبارت... مولانا نینگ پیری بولگن شمس تبریزی اوچون قوردیریلگن مسجد, ایپلیکچی مسجدی, شراف الدین جامع مسجدی, شیخ صدرالدین قونوی مسجدی, علاالدین مسجدی و عزیزیه مسجدی قونیه ده گی اینگ مهم مسجد لر آره سیده اورین ایگلله ماقده.  اوشبو مسجد لر نینگ همه سی اوزی گه خاص خصوصیت لر گه ایگه. 

قاره تای مدرسه سی, یوقه مناره مدرسه سی, سرچه لی مدرسه, پموقچی سرای و محمد پاشا مجتمع سی قونیه ده اورین آلگن یوزلب ییللیک تاریخ گه ایگه اثر لر آره سیده اورین آلماقده. 

قونیه, اوروپا نینگ اینگ بای تروپیکال کَپَلَک باغچه سی گه ایگه.  تقریباً 8000 متر مربع لیک بیر ساحه ده قوریلگن اوشبو باغچه ده اونلب کپلک بیلن تروپیکال اوسیملیک توری موجود. 

قونیه ده اورین آلگن سیلله قشلاغی مسیحی لیک دوری دن قالگن اینگ مهم مرکز لردن بیری نی تشکیل ایتماقده.  اناطولی ده گی بیرینچی کلیسا لردن بیری بولگن, 300 – ییلده قوریلگن آیا- ایلینا کلیسا سی هم خوددی شوو ییر نینگ اوزیده اورین آلماقده. 

قونیه هر ییل اوچ میلیون دن آرتیق سیاح نی کوتیب آلماقده. 

قونیه گه بارسنگیز اگر, مولانا موزیمی نی کورمسدن, علاالدین تپه سی گه بارمسدن, گوشتلی نان ییمسدن, بامیه شوربا ایچمسدن و تندور کباب ییمسدن کیلمنگ لطفاً.