Erdo‘g‘an Ozarbayjon prezidenti Ilhom Aliyev bilan uchrashdi
Erdo‘g‘an Turkiy davlatlar tashkilotiga a’zo mamlakatlar rahbarlarining navbatdan tashqari sammitini Turkiyada o‘tkazish tashabbusi uchun Ozarbayjon Prezidentiga minnatdorlik bildirdi.
Ozarbayjon Respublikasi Prezidenti Ilhom Aliyev Anqarada Turkiya Prezidenti Rajab Tayyip Erdo‘g‘an bilan uchrashdi.
Bu haqda Turkiya prezidenti Matbuot xizmati xabar berdi.
Qayd etilishicha, Anqaradagi Prezidentlik saroyida Ozarbayjon Prezidenti nomiga faxriy qorovul saf tortdi. Turkiya Prezidenti Rajab Tayyip Erdo‘g‘an Ozarbayjon Prezidenti Ilhom Aliyevni kutib oldi. Davlat rahbarlari birgalikda suratga tushdi.
Shundan so‘ng Erdo‘g‘an Turkiy davlatlar tashkilotiga a’zo mamlakatlar rahbarlarining navbatdan tashqari sammitini Turkiyada o‘tkazish tashabbusi uchun Ozarbayjon Prezidentiga minnatdorlik bildirgan. Tomonlar turkiy davlatlar sammiti formatining ahamiyati va tadbir Turkiyadagi zilzila oqibatlarini yumshatishga bag‘ishlanganini ta’kidlagan.
Erdo‘g‘an Ozarbayjonning Turkiyadagi dahshatli zilziladan so‘ng darhol ko‘rsatgan birodarlik yordami va birdamligini eslagan. Turkiya yetakchisi Ozarbayjon qutqaruvchilari va shifokorlarining zilziladan jabr ko‘rgan hududlardagi sa’y-harakatlarini, tabiiy ofat oqibatlarini bartaraf etish uchun mamlakatning ko‘rsatgan insonparvarlik yordamini yuqori baholagan.
O‘z o‘rnida, Ilhom Aliyev zilzila munosabati bilan yana bir bor hamdardlik bildirgan hamda Ozarbayjon xalqining tabiiy ofatdan qattiq larzaga tushganini aytgan.
Shuningdek, suhbat chog‘ida Ozarbayjon va Armaniston o‘rtasidagi munosabatlarni normallashtirish, tinchlik shartnomasi bo‘yicha muzokaralar jarayoni haqida ham fikr almashilgan.
Kecha, 15 mart kuni O‘zbekiston Respublikasi Prezidenti Shavkat Mirziyoyev Turkiya Prezidenti Rajab Tayyip Erdo‘g‘an bilan uchrashgan edi. Shu kuni Qirg‘iziston Respublikasi Prezidenti Sadir Japarov ham Anqara shahrida Rajab Tayyip Erdo‘g‘an bilan ikki tomonlama muzokaralar o'tkazdi.
Eslatib o'tamiz, bugun, 16 mart kuni Turkiya poytaxti Anqarada Turkiy Davlatlar Tashkilotiga a’zo davlatlar Davlat rahbarlarining navbatdan tashqari sammiti bo‘lib o‘tadi. Sammit Ozarbayjon Respublikasi Prezidenti Ilhom Aliyev tashabbusi bilan o‘tkazilmoqda. Sammit dasturi yakunida davlat rahbarlari Anqara deklaratsiyasini imzolaydilar.
