Sharl Mishel Yangi O‘zbekistondagi demokratik yangilanishlar dasturini qo‘llab-quvvatladi

O‘zbekiston Respublikasi Prezidenti Shavkat Mirziyoyev bilan Yevropa kengashi Prezidenti Sharl Mishel telefon orqali muloqot qildi.

1851799
Sharl Mishel Yangi O‘zbekistondagi demokratik yangilanishlar dasturini qo‘llab-quvvatladi

Bugun 4-iyul kuni O‘zbekiston Respublikasi Prezidenti Shavkat Mirziyoyevning Yevropa kengashi Prezidenti Sharl Mishel bilan telefon orqali muloqoti bo‘lib o‘tdi. Bu haqida O‘zbekiston Respublikasi Prezidenti Matbuot xizmati ma’lumot bo‘lishdi.

Ushbu ma’lumotga ko‘ra muloqat chog‘ida O‘zbekiston va Yevropa ittifoqi o‘rtasidagi ko‘p qirrali va o‘zaro manfaatli hamkorlikni yanada kengaytirish masalalari ko‘rib chiqilgan.

Suhbat avvalida Prezident Shavkat Mirziyoyev, Yangi O‘zbekistonda ortga qaytmas demokratik va ijtimoiy-iqtisodiy yangilanishlarni amalga oshirish uchun ko‘rsatilayotgan har tomonlama ko‘mak uchun alohida minnatdorlik bildirgan.

Yevrokengash Prezidenti, o‘z navbatida, O‘zbekistonning kuchli fuqarolik jamiyati va huquqiy davlat barpo etish sari ochiq islohotlar yo‘lini davom ettirish borasidagi sa’y-harakatlarini qo‘llab-quvvatlagan.

Shu ma’noda Qoraqalpog‘istondagi vaziyatning ba’zi buzg‘unchi kuchlar tomonidan izdan chiqarilishiga yo‘l qo‘ymaslik kerakligi alohida qayd etilgan. Sharl Mishel jinoiy unsurlar tomonidan uyushtirilgan tartibsizliklar natijasida qurbon bo‘lganlarning oilalari va yaqinlariga hamdardlik so‘zlarini yetkazgan.

Suhbat chog‘ida O‘zbekiston va YEI o‘rtasida Kengaytirilgan sheriklik va hamkorlik to‘g‘risidagi bitimning tayyorlanishini yakuniga yetkazish masalasiga alohida e’tibor qaratilgan.

“Preferensiyalar bosh tizimi plyus” afzalliklaridan foydalangan holda o‘zaro savdo va investitsiyalarni ko‘paytirish muhimligi ta’kidlangan.

Tomonlar amaliy hamkorlikning aniq dastur va loyihalarini, eng avvalo, “yashil iqtisodiyot”, raqamlashtirish, innovatsiyalar, logistika, qishloq xo‘jaligi, ekologiya, ta’lim va sog‘liqni saqlash sohalarida ilgari surish masalalariga alohida to‘xtalganlar.

Markaziy Osiyo mintaqasida yuzaga kelayotgan vaziyat hamda YEI tuzilmalari bilan ko‘p tomonlama muloqotning darajasini yanada yuksaltirish yuzasidan fikr almashilgan.

O‘zaro bog‘liqlikni kuchaytirish, shuningdek, mintaqada xavfsizlik va barqarorlikni ta’minlash, shu jumladan Afg‘onistonda mustahkam tinchlik qaror topishiga ko‘maklashish va uning xalqiga qo‘ldan kelgancha yordam ko‘rsatishga qaratilgan yirik xalqaro tadbirlarni O‘zbekistonda tashkil etish masalasi qo‘llab-quvvatlangan.



Aloqador xabarlar