O'zbekistonda 8 Mart – Xalqaro xotin-qizlar kuni nishonlandi
O‘zbekiston Prezidenti Shavkat Mirziyoyev 8 Mart – Xalqaro xotin-qizlar kuniga bag‘ishlangan tantanali marosimda nutq so'zladi.
Kecha, O'zbekistondagi Xalqaro kongress markazida 8 Mart – Xalqaro xotin-qizlar kuniga bag‘ishlangan bayram tadbiri bo‘lib o‘tdi.
Davlat rahbari matbuot xizmati ma’lumotiga ko‘ra, O‘zbekiston Prezidenti Shavkat Mirziyoyev ayollarni samimiy tabriklab, ularga yuksak ehtiromini bildirdi.
– Xalqimiz azal-azaldan Ona siymosini, Ayol zotini Yaratganning ulug‘ ne’mati, tengsiz mo‘’jizasi, deb biladi, uni hamisha ardoqlab-asrab yashaydi, – dedi davlatimiz rahbari.
O‘zbekiston Respublikasi Prezidentining shu yil 5 martdagi farmoniga muvofiq, bir guruh xotin-qizlar yuksak unvon, orden va medallar bilan, Prezident qaroriga binoan esa yigirma sakkiz nafar qiz "Zulfiya" nomidagi Davlat mukofoti bilan mukofotlandi.
Bayram tadbirida ana shu yuksak mukofotlar tantanali ravishda topshirildi.
– Barchangizni yana bir bor bugungi bahor va nafosat, go‘zallik va latofat bayrami bilan samimiy tabriklayman. Sizlarga dunyodagi eng bebaho boylik – oilaviy baxt-saodat, tinchlik-xotirjamlik, farzandlar va nabiralar kamolini ko‘rib yurish quvonchi hamisha yor bo‘lishini tilayman. Qalbingiz doim bugungi bahordek yashnab tursin, - dedi Prezident.
Qoraqalpog‘iston Respublikasi, Toshkent shahri va viloyatlardan tashrif buyurgan xotin-qizlar, turli vazirlik va idoralar xodimlari fayzli dasturxon atrofida bayramni nishonladi. Tadbirda chet ellik diplomat ayollar, xalqaro tashkilotlar vakolatxonalari vakillari ham ishtirok etdi.
Bayram tantanali konsert dasturi bilan davom etdi.
