Turkiyada O‘zbek tili bayrami kuni keng nishonlandi

21 oktyabr - O‘zbek tili bayrami kunini keng nishonlash doirasida O’zbekistonning Turkiyadagi elchixonasi qoshidagi “O‘zbek tili do‘stlari” klubi a’zolari tomonidan Turkiya  madaniyat va turizm vazirligi Xorijdagi turklar va qardosh jamiyatlar boshqarmasi (YTB)ning Anqaradagi ofisida madaniy-ma’rifiy tadbir o‘tkazildi.

Tadbirda 1989 yil 21 oktyabr kuni o‘zbek tiliga davlat tili maqomining berilgani va ushbu tarixiy sana 2019 yilda davlat rahbari Shavkat Mirziyoyev tashabbusi bilan O‘zbek tili bayrami kuni sifatida belgilangani to‘g‘risida ma’lumot berildi.

Bugungi kunda o’zbek tilining boy imkoniyatlaridan keng foydalanish uchun yaratilgan shart-sharoitlar, o‘zbek tilining xalqaro ko‘lamdagi nufuzi va mavqeini oshirish borasida qilinayotgan sa’y-harakatlar qayd etildi. O’zbek tili Birlashgan Millatlar Tashkilotining yuksak minbarida yangrayotgani alohida ta’kidlandi.

Tadbir davomida Anqara shahrida ta’lim olayotgan xorijlik talabalar tomonidan O‘zbek tili bayrami kuni munosabati bilan tayyorlangan videorolik  namoyish etildi.

Shu bilan birga, o‘zbekistonlik talabalar tomonidan Alisher Navoiy, Abdulla Avloniy, Abdulhamid Cho‘lpon, Zulfiyaxonim va Nodirabegim qalamiga mansub she’riy asarlar o‘qib berildi.