блинкен хитайда зийарәттә болушқа тәййарланмақта
америка қошма иштатлири ташқи ишлар министири антони блинкенниң мушу ай (2023-йили ийун) ниң ахирида хитайни зийарәт қилиш мумкинчилики барлиқи билдүрүлди.
түркийә авази радийоси хәвири: вал стрит журнал гезитиниң америка вә хитай әмәлдарлирини мәнбә қилған хәвиридә көрситилишичә, министир антони блинкенниң мушу айниң ахирида хитайни зийарәт қилиши мумкин икән.
америка ташқи ишлар министири антони блинкенниң феврал ейида, техиму ениқ қилип ейтқанда, хитай билән америка оттурисида җиддийчилик пәйда қилған «җасус шар» вәқәсидин илгири хитайни зийарәт қилишни пиланлиғанлиқи әсләп өтүлгән хәвәрдә, нөвәттә һәр икки тәрәпниң блинкенниң зийаритигә тәййарлиқ қиливатқанлиқи қәйт қилинди.
министир блинкенниң бейҗиңда хитай компартийәси мәркизий ташқи мунасивәтләр комитети ишханисиниң мудири ваң йи, хитай ташқи ишлар министири чин гаң вә башқа йуқири дәриҗилик әмәлдарлар билән көрүшүшиниң пиланлиниватқанлиқиға ишарәт қилинған хәвәрдә, антони блинкенниң хитай дөләт рәиси ши җинпиң билән көрүшүш – көрүшмәслик мәсилисдә арисалда болуп қалғанлиқи әскәртилди.
антони блинкен америка һава бошлуқиға киргән шарниң етип чүшүрүветилиши пәйда қилған киризис сәвәбидин феврал ейидики хитай зийаритини әмәлдин қалдурғаниди.
киризис сәвәбидин дипломатик мунасивәтләр көрүнәрлик дәриҗидә үзүлүп қалған болсиму, америка дөләт бихәтәрлик мәслиһәтчиси җәйк сулливан билән хитайниң пишқәдәм дипломати, хитай компартийәси мәркизий ташқи мунасивәтләр комитети ишханисиниң мудири ваң йи 10- майдин 11- майғичә австирийәниң вийенна шәһиридә сөһбәт өткүзүп, мунасивәтләрни әслигә кәлтүрүш йолида қәдәм ташлиғаниди.
