خىتاي ئامېرىكادىن ئۆچ ئېلىشنى باشلىدى

تۈركىيە ئاۋازى رادىيوسى خەۋىرى: خىتاي ئامېرىكا ئاۋام پالاتاسى باشلىقى نەنسى پېلوسى خانىمنىڭ تەيۋەن زىيارىتىدىن كېيىن، ۋاشىنگتون بىلەن بولغان بەزى ئىككى تەرەپ دىيالوگلىرىنى ۋە ھەمكارلىق مېخانىزملىرىنى توختاتقانلىقىنى جاكارلىدى.

خىتاي تاشقى ئىشلار مىنىستىرلىقىنىڭ باياناتىدا بىلدۈرۈلىشىچە، مۇداپىئە ساھەسىدە ئامېرىكا بىلەن بولغان ئۈچ دىيالوگ مېخانىزمى ئەمەلدىن قالدۇرۇلغان بولۇپ، بۇنىڭدىن باشقا، ئەدلىيە ھەمكارلىقى، چېگرا ھالقىغان جىنايەتلەرگە زەربە بېرىش، زەھەرلىك چېكىملىككە قارشى كۈرەش ۋە كىلىمات ئۆزگىرىشى قاتارلىق بەش ساھەسىكى مېخانىزمنى توختاتقان.

خىتاينىڭ قارارى بويىچە، مۇداپىئە ساھەسىدە، ئامېرىكا بىلەن خىتاي ئوتتۇرىسىدىكى ئالدىنقى سەپ قوماندانلىرىنىڭ كۆرۈشۈشى، مۇداپىئە سىياسىتىدە كوردىناتسىيە كۆرۈشۈشلىرى ۋە ھەربىي دېڭىز مۇزاكىرە كېلىشىمى كۆرۈشۈشلىرى ئۆتكۈزۈلمەيدىكەن.

خىتاي نەنسى پېلوسى خانىم ۋە ئۇنىڭ ئائىلىسىگە ئېمبارگو يۈرگۈزىدىغانلىقىنى بىلدۈرگەن ئىدى.

تەيۋەننى ئۆزىنىڭ زېمىنىنىڭ بىر پارچىسى ئىكەنلىكىنى ئىلگىرى سۈرىدىغان خىتاي ھۆكۈمىتى، نەنسى پېلوسى خانىمنىڭ زىيارىتىنى «ئىگىلىك ھوقۇقى ۋە زېمىن پۈتۈنلۈكىگە دەخلى-تەرۇز قىلغانلىق» ئىكەنلىكىنى ئەسكەرتىپ، بۇنىڭغا قارشى قاتتىق تەدبىرلەرنى يولغا قويىدىغانلىقى توغرىسىدا ئاگاھلاندۇرۇشلارنى قىلغان ئىدى.