karén donfrid: türkiyening qanunluq endishisini étirap qilimiz
amérika tashqi ishlar ministirliqi meslihetchisi karén donfrid türkiyening bezi döletler teripidin térrorluq teshkilatigha yardem bérilishige bolghan qanunluq endishisini étirap qilidighanliqini éytti.
türkiye awazi radiyosi xewiri: amérika tashqi ishlar ministirliqining yawropa we yawro-asiya ishliri meslihetchisi karén donfrid türkiyening finlandiye we shiwitsiyening shimaliy atlantik ehdi teshkilatigha eza bolushigha bolghan qanunluq endishisini étirap qilidighanliqini bildürüp, «bu mesililer pat yéqinda hel qilinidu» dep oylaydighanliqini éytti.
amérika kéngesh palatasining tashqi munasiwetler komitéti finlandiye we shiwitsiyening shimaliy atlantik ehdi teshkilatigha eza bolush iltimasigha qarita mexsus yighin chaqirdi.
yighinning échilishida, komitét reisi démokratchi bob ménéndéz bilen jumhuriyetchiler partiyesining ezasi jim rich otturisida türkiyege dair qisqa talash-tartish yüz berdi.
ménéndéz mezkuz ikki döletning shimaliy atlantik ehdi teshkilatigha eza bolushigha türkiyening naraziliq bildürishining rusiyege paydiliq ikenlikini ilgiri sürdi. buninggha jawaben jim rich: «shiwitsiye we finlandiye her ikkilisi özlirining türkiye bilen yaxshi niyette söhbetleshkenlikrini bildürdi. bu mesilini eshu döletlerge qoyup bérish eng yaxshi. emma shunimu éytayliki bu mesile baldurraq tügishi kérek» dédi.
donfrid sözide finlandiye we shiwitsiyening shimaliy atlantik ehdi teshkilatigha qoshulushining ittipaqni téximu kücheytidighanliqini bildürüp türkiye otturigha qoyghan endishiler üstidimu toxtaldi.
donfrid finlandiye we shiwitsiyening shimaliy atlantik ehdi teshkilatigha eza bolushining barliq döletlerning teng awaz bérishi bilen kapaletke ige qilinidighanliqini tekitlep: «elwette, türkiyege oxshash amérikamu térorluqni qollashni axirlashturushini xalaydu. biz bu ishqa estayidil muamile qilimiz. méning qarishimche, bu 3 dölet otturisidiki söhbetler ongushluq boluwatidu» dédi.
yene bir tereptin, kéngesh palata ezasi ménéndézning yighinda amérikaning térrorluq teshkilati p k k/ y p g ni qollighanliqi toghrisidiki iqrarimu kishilerning diqqitidin qachmidi.
ménéndéz «emeliyet shuki, p k k we y p g mesiliside finlandiye we shiwitsiyening tutqan pozitsiyesi bizningkige oxshap kétidu, bilginingizdek, bu teshkilatlar bizning daéshqa qarshi kürishimizge yardem berdi» dédi.
