rusiyening gherb elliri bilen bolghan munasiwetlirining hazirqi ehwali

yawroasiyagha nezer - 70

1630844
rusiyening gherb elliri bilen bolghan munasiwetlirining hazirqi ehwali

rusiye – sherqiy yawropa – gherb munasiwetlirining hazirqi ehwali

abdresul ishaqow

2021-yili, 21 – aprél küni, rusiye pirézidénti wiladimir putin fédératsiye mejliside qilghan sözide, «rusiyege düshmenlerche pozitsiye tutuwatqanlar» ni agahlandurup mundaq dédi: «biz köwrüklerni köydürüwétishni xalimaymiz, lékin beziler bizning yaxshi niyitimizni ajizliq dep qarisa, ular shuni bilishi kérekki, rusiyening jawabi simmétrik, téz we keskin bolidu.» putinning bu signali aldi bilen gherb döletlirige qaritilghan idi.

yéqinqi künlerdin buyan, gherb bilen rusiye otturisidiki diplomatlarning özara chégradin qoghlap chiqirilishi ewj élip ketti. aldi bilen, bu weqelerning jeryanigha nezer tashlap chiqayli.

2021-yili, 15 – aprél küni, rusiyege émbargo yürgüzüwatqan amérika qoshma ishtatliri, 10 rus diplomatni «xalanmighan adem» élan qildi. 21 – aprél küni, rusiyemu amérikaliq 10 diplomatning 1 ay ichide chégradin ayrilishini telep qildi. 22 – aprél küni, amérika qoshma ishtatlirining moskwada turushluq bash elchisi jon sulliwan meslihetler üchün washingtongha qaytti.

shu küni, polsha 3 rus diplomatni «xalanmighan adem» élan qildi. 16 – aprél küni, rusiye buninggha jawaben polshaliq 5 diplomatni chégradin qoghlap chiqirighanliqini bildürdi.

2021-yili, 17 – aprél küni, chéxiye bash ministiri andréj babish, praganing, rus axbarat organlirining 2014 – yili bir oq - dora iskilatida meydangha kelgen partlash bilen alaqisi barliqidin guman qiliwatqanliqini, 18 rus diplomatining «xalanmighan adem» élan qilinghanliqini jakarlidi. rusiye buninggha jawaben, chéxiyelik 20 diplomatni chégradin qoghlap chiqardi.

shu küni, ukraina bilen rusiye özara birer diplomatning döletni terk étishini telep qildi.

2021-yili, 20 – aprél küni, rusiye bulghariyelik ikki diplomatni chégradin qoghlap chiqiridighanliqini bildürdi. mart éyida, bulghariye ikki rus diplomatni chégradin qoghlap chiqardi.

2021-yili, 22 – aprél küni, silowakiye bash ministiri édward hégér, chéxiyening weziyiti sewebidin, 3 rus diplomatning bir hepte ichide dölitidin ayrilishi kéreklikini bildürdi.

2021-yili, 23 – aprél küni, chéxiye bilen hemkarliq ornatqanliqlirini bildürüp, baltiq déngizi döletliridin litwanye 2, éstoniye we latwiye birer rus diplomatni chégradin qoghlap chiqirishni qararlashturdi. rusiyemu bu döletlerge oxshash shekilde jawab qayturdi.

rusiye bixeterlikni közde tutup gherb chégrasigha esker orunlashturuwatqan we terepler bir-birini jasusluq bilen eyiblewatqan bir peytte meydangha kéliwatqan diplomatlarni chégradin qoghlap chiqirish heriketlirining dawamlishish éhtimalliqi bardur. hazirche sherqiy yawropa bilen rusiye otturisida yüz bériwatqan bu heriketler, gherbiy yawropa döletliri bilen rusiye otturisidimu yüz bérishi mumkin. buningdin bashqa yene, küzde ötküzülidighan duma saylamlirighiche, gherbning qollishidiki rusiye öktichiliri, 21-apréldikige oxshash namayishlarni dawamlashturidu. bu namayishlar sewebidin, öktichilerni qollawatqan rusiyediki diplomatlar chégradin qoghlap chiqirilishi, gherb döletliri buninggha jawab qayturushi mumkin. derweqe, rusiye bilen gherb otturisidiki axbarat urushi alliqachan yuqiri pellige yetti. rusiye, «shimaliy atlantik ehdi teshkilati bizni qorshaw astigha éliwatidu» dep qarisa, gherbmu rusiyening kéngeymichilik siyasitini yolgha qoyuwatqanliqini ilgiri sürmekte. bu sürkilishning rayon döletlirige passip tesiri körsitishi muqerrerdur.



مۇناسىۋەتلىك خەۋەرلەر