türkiye, süriyege insanperwerlik yardemlerni üzüldürmey dawamlashturidu
b d t xewpsizlik kéngishida süriyege türkiye arqiliq insanperwerlik yardemlerning yollinish teklipige rusiye bilen xitay qarshi chiqqan idi.
türkiye awazi radiyosi xewiri: türkiye, süriyege qilinidighan yardemlerning üzlüksiz dawamlishishi üchün tirishchanliq körsitishni dawamlashturidighanliqini bildürdi.
tashqi ishlar ministirliqining yazma bayanatida, b d t xewpsizlik kéngishida süriyege türkiye arqiliq insanperwerlik yardemlerning yollinishini rusiye bilen xitay ikki qétim (wéto) ret qilghandin kéyin, jilwegözu chégra éghizidin yardemlerning bir yil dawamlashturulishigha dair kélishim hasil qilinghanliqi eskertildi.
bayanatta, «yene bir tereptin, insanperwerlik yardem méxanizmining muhim bir parchisini teshkil qilidighan önjüpinar-babussalame chégra éghizining bu qétimqi b d t xewpsizlik kéngishining qararigha kirgüzülmigenliki, shorpishayne bir pozitsiye boldi» déyildi hemde bu chégra éghizining yardem méxanizmidin chiqiriwétilishining heleb rayonidiki texminen 1 milyon 300 ming puqraning insanperwerlik yardemge érishishini qéyinlashturidighanliqi we türkiyening yelkisige alghan mesuliyetlirini téximu éghirlashturidighanliqi eskertildi.
bayanatta mundaq déyildi:
«bu munasiwet bilen türkiye, süriyege xelqara insanperwerlik yardem paaliyetlirining üzülmey dawamlishishi üchün izchil tirishidu. maqullanghan yardem méxanizmida körülgen özgirishler keltürüp chiqirishi mumkin bolghan qoshumche sinaqlargha taqabil turush üchün b d t we uninggha qarashliq organlar qatarliq barliq alaqidar terepler bilen maslishish we hemkarlishish ichide heriket qilidu»
