yawroasiya iqtisadiy ortaq gewdisining kélechiki

yawroasiya iqtisadiy ortaq gewdisining 2020 - yili 19 – may küni  chaqirilghan téléwiziye - téléfon yighini we kélechiki.

1425063
yawroasiya iqtisadiy ortaq gewdisining kélechiki

yawroasiya iqtisadiy ortaq gewdisining nöwetchi reisi bélarusiye pirézidénti aléksandir lukashénkoning riyasetchilikide 2020 – yili 19 – may küni  téléwiziye - téléfon yighini chaqirildi. yighingha bélarusiye, moldawiye, rusiye qatarliq döletlerning pirézidéntliri, erméniye bash ministiri we yawroasiya iqtisadiy ortaq gewdisining bash katipi qatnashti. «wuxen wirusi» sewebidin widéo konférans wasitisi arqiliq ishqa ashurulghan yighinda, yawroasiya iqtisadiy ortaq gewdisining 2025 – yilghiche bolghan iqtisadiy islahat xizmiti pilani heqqide muzakire élip bérildi. bu yighinda qobul qilinishqa tégishlik xizmet pirogrammisi, rehberlerning yil axirida miniskte chaqirilishi pblanlanghan yüzturane uchrishish yighinigha kéchiktürüldi. yighinda yene, teshkilatning 2020 – 2021 – yilliq heriket pilani qobul qilindi. ilgiriki yighinlardin perqliq halda, bu qétimqi yighinda rehberlerning teshkilat paaliyetliri we nishanlirigha qarita tenqidlirining köpeygenliki diqqet qozghidi.

aléksandir lukashénko yighinda sözligen nutiqida, tebiiy gaz bahasidiki tengpungsizliq mesilisini otturigha qoydi. teshkilatning küchlinishi we pütünlishishi tebiiy gaz we asasliqi énérgiye bahasining birlik ichide oxshash bolushi lazimliqini eskertken lukashénkoning tenqidliri rusiyege qarita idi. erméniye bash ministiri nikol pashiyanmu lukashénkoni qollidi we teshkilatning ortaq énérgiye bahasi bolushi kéreklikini tekitlidi.

qirghizistan pirézidénti sooronbay jénbékow tamozhnilarda körülüwatqan mesililerning «wuxen wirusi» mezgilidimu hel qilinalmighanliqini tekitlidi, hemde ukraina bilen yawropa elliridin kélidighan mehsulatlargha erkin tiranzit imkaniyiti bérilishi teklipini sundi.

qazaqistan pirézidénti qasim jömert toqayéw, teshkilatning 2025 – yilghiche ishlinidighan iqtisadiy islahat xizmiti pilanini tenqid qildi. teshkilatqa eza döletler bilen, bolupmu rusiye bilen bolghan soda nisbitide töwenlesh körülüwatqanliqini qeyt qilghan toqayéw, teshkilat qarmiqida her bir dölet üchün barawerlik shertlirining shekillendürülmigenlikini eskertish bilen bir waqitta, teshkilatning qurulush nishanining, iqtisadiy islahat élip bérish  ikenlikini, shunga, bashqa sahelerdiki islahat xizmetliri pilanlirining közdin kechürülüshining shert ikenlikini tekitlidi. uning nutiqida xelqning menpeetlirini nezerde tutushning zörürlükini tekitlishi diqqet qozghidi.

yawroasiya iqtisadiy ortaq gewdisining parawuzi hésablinidighan rusiye pirézidénti wiladimir putinning nutiqida bolsa, teshkilatning dairisini téximu kéngeytishning zörürlüki bar idi. u, israiliye, misir we hindistan bilen hemkarliq söhbetliri ötküzülüwatqanliqini bildürdi.

özbékistanning teshkilatqa közetküchi eza bolush mesilisi otturigha qoyulushqa bashlidi. bu yilning bashlirida özbékistanda rusiye üchün jasusliq qilghan kishilerning türmige tashlinishi, 2020 – yili 14 – may küni rusiye tashqi ishlar ministirliqining, özbékistanda rus tilining resmiy uchur - alaqe ishlirida ishlitilishige jaza bérilishige naraziliq bildürüshi we özbékistanning buni «ichki ishlirimizgha arilashqanliq» dep qarishi, özbékistanning teshkilatqa közetküchi eza bolushining aldidiki tosalghularning bir qismi ikenlikini körsitidu.

yawroasiya iqtisadiy ortaq gewdisining téxiche tereqqiyat modélini tapalmasliqi we köp sandiki qararliri hem  ichki ishlirining moskwaning küntertipide ishqa ashurulushi, «wuxen wirusi» mezgilide teshkilatqa eza bashqa döletlerni adettin tashqiri derijide biaram qilghandek qilidu. «wuxen wirusi» ning yawroasiya jughrapiyeside uzun muddet dawamlishishi teshkilatning paaliyetliri we kélechikige biwasite tesir körsitishi mumkin.



مۇناسىۋەتلىك خەۋەرلەر