yawroasiya iqtisadiy birleshmisining pewquladde yighini

yawroasiya iqtisadiy birleshmisige eza döletler ning 14 – aprél küni chaqirilghan pewquladde téléwiziye - téléfon yighini.

1403620
yawroasiya iqtisadiy birleshmisining pewquladde yighini

türkiye awazi xewiri: yawroasiya iqtisadiy birleshmisining nöwetchi reisi bélarusiye pirézidénti aléksandir lukashénkoning teklipige biinaen, 2020 – yili 14 – aprél küni  aliy derijilik rehberler téléwiziye - téléfon yighini chaqirildi. yighingha, bélarusiye, qirghizistan, rusiyening dölet bashliqliri, erméniye bash ministiri we yawroasiya iqtisadiy birleshmisining bash katipi qatnashti. 10 – aprél künimu yawroasiya iqtisadiy birleshmisige eza döletler  bilen  moldawaning hökümet bashliqliri  téléwiziye - téléfon yighini chaqirghanidi.

yighinda, eza döletlerning «wuxen wirusi» gha qarshi küreshliri tonushturuldi, hemde buningdin kéyinki basquchta tashlinidighan qedemler we qollinilidighan tedbirler heqqide muzakire élip bérildi. yighinda, rehberler iqtisadiy bir gewdilishishning aqsap qalmasliqi, istiratégiyelik mehsulatlarning tamozhnilarda turup qalmasliqi, digitallishish basquchining tézleshtürülüshi, «wuxen wirusi» gha qarshi küresh qatarliq mesililerde ortaq tonush hasil qildi. shuni alahide tekitlesh hajetki, yémek – ichmek bixeterlikini kapaletke ige qilish üchün, yawroasiya iqtisadiy birleshmisige eza döletler 2020 – yili 31 – mart küni bir qisim yémek - ichmek mehsulatlirining birleshmining sirtigha éksport qilinishini 2020 – yili 30 – iyunghiche meniy qildi. insanperwerlik yardem meqsitide chet ellerge ewetilidighan yémek – ichmekler buning sirtida qalduruldi.

yawroasiya iqtisadiy birleshmisige eza döletler «yéshil karidor» mulazimitini ishqa kirishtürüp, yuqum mezgilide yüklerning tamozhnilarda turup qalmasliqini kapaletke ige qilishqa tirishmaqta. , rusiye pirézidénti wiladimir putinning yuqum mezgilide bir qisim mehsulatlardin héch baj élinmasliqi toghruluq sunghan teklipimu yéqin kelgüside emeliylishishi mumkin. yuqum basquchi uzirap ketken teqdirde, yawroasiya iqtisadiy birleshmisining yawroasiya tereqqiyat bankisi we yawroasiya güllinish we tereqqiyat fondi pullirining, iqtisadni janlandurush we «wuxen wirusi» gha qarshi küresh tedbirliri dairiside ishlitilishi küntertiptidur. rehberler yuqum basquchida birleshmige eza döletlerning merkez bankiliri we munasiwetlik ministirliqlargha mas qedemde heriket qilishi toghruluq yolyoruq chüshürdi. yawroasiya iqtisadiy birleshmisi qarmiqida qurulghan «wuxen wirusi» gha qarshi küresh maslashturush heyiti paaliyetlirini dawamlashturmaqta.

yighindin kéyin dölet bashliqliri ortaq bayannamini qobul qildi. bayannamide, dunyaning herqaysi jayliridiki  barliq toqunushlargha xatime bérilishi, bir tereplimilik émbargolarning bikar qilinishi we «wuxen wirusi» gha qarshi ortaq küresh qilishning zörürlüki tekitlendi.

rusiye hazirghiche «wuxen wirusi» gha qarshi küresh tedbirliri dairiside yawroasiya iqtisadiy birleshmisige eza döletlerge  70000  sinaq dorisi ewetti. rusiye birleshmining rehbiri süpitide dora bilen teminlesh  mesilisidimu yawroasiya iqtisadiy birleshmisige eza döletlerge yardemchi bolidighanliqini, «wuxen wirusi» waksinisi tépilghan teqdirde, buni hemrahliri bilen ortaqlishidghanliqini bildürmekte.

yighindin kéyin, bélarusiye pirézidénti aléksandir lukashénko dölet bashliqlirini 2020 – yili 19 – may küni miniskte chaqirilishi pilanliniwatqan yawroasiya iqtisadiy birleshmisining pewquladde yighinigha teklip qildi. uning bu teklipini qobul qilip qilmasliq, mezkur döletlerning  yuqumning shu waqittiki ehwali bilen zich munasiwetlik, elwette. chünki, yawroasiya jughrapiyeside yuqumning téxiche eng yüksek sewiyege yyetkenlikini éytish qiyindur.

2020 – yili 19 – may küni chaqirilidighan bashliqlar yighinida, yawroasiya iqtisadiy birleshmisining 2025 – yylghiche iqtisadiy bir gewdilishish nishan qilinghan pilan layihesi muzakire qilinidu. bu pilan layihesi birleshmining iqtisadiy bir gewdilishishi jehettiki muhim basquchliridin biridek qilidu.

nöwette hemmining diqqti, yawroasiya iqtisadiy birleshmisining yuqum ötkilidin qandaq ötidighanliqi, sherq bilen gherb otturisidiki köwrük bolup bolalmaydighanliqigha merkezleshmekte. qirghizistan pirézidénti jénbékowning bashliqlar yighinida  tekitlep ötkinidek, yawroasiya iqtisadiy birleshmisi üchün yuqum basquchi heqiqiy bir sinaq bolidu.



مۇناسىۋەتلىك خەۋەرلەر