«мөминләр үчүн вақитларниң һәммиси қиммәтлик»

диний ишлар идарисиниң башлиқи пирофессор доктор әли әрбаш мөминләр үчүн вақитлар вә заманларниң һәммисиниң қиммәтлик икәнликини ейтти.

935406
«мөминләр үчүн вақитларниң һәммиси қиммәтлик»

түркийә авази радийоси хәвири:  ислам дунйасида илаһий рәһмити, бәрикити вә мәғпирити мол мубарәк үч айниң хәвәрчиси сүпитидә қобул қилинидиған рәғаиб қәндили бүгүн кечә идрак қилиниду.

мусулманларға нисбәтән наһайити зор әһмийәткә игә мубарәк үч айдин бири болған рәҗәб ейиниң тунҗи пәйшәмбә күнини җүмәгә туташтуридиған кечиси идрак қилинидиған рәғаиб қәндили «рәһмәт вә мәғпирәт кечиси» дәп атилиду.

диний ишлар идариси диний паалийәтлар башқармиси рәғаиб қәндилини күтүвелиш мунасивити билән түрлүк паалийәтләрни уйуштуриду.

әнқәрәдә «мәликә хатун», бурсада «улу», йозгатта «бүйүк чапаноғлу», айдинда «куллиййә», конйада «һаҗи вәйисзада», истанбулда «фатиһ», «әййуб султан» вә «валидәи җәдид» җамәлиридә ишқа ашурулидиған мәхсус пирограммиларда, қуран кәрим тилавәт қилиш вә мәвлут оқуш паалийити өткүзүлиду.

әнқәрәдә «мәликә хатун» җамәсидә өткүзүлидиған «мәхсус рәғаиб қәндили пирограммиси» ға диний ишлар идарисиниң башлиқи пирофессор доктор әли әрбашму қатнишиду.

әрбаш «рәғаиб қәндили» мунасивити билән елан қилған байанатида, «рәғаиб қәндили» ниң «мәниви мәвсумға қәдәм қойуш» ниң хәвәрчиси икәнликини ейтти.

мөминләр үчүн вақитлар вә заманларниң һәммисиниң қиммәтлик икәнликини әскәрткән әрбаш, бундақ вақитлар вә заманларни аллаһниң разилиқини көзләп таәт - ибадәт билән өткүзүшниң зөрүрлүкини тәкитләп мундақ деди: «шуниң билән бир вақитта, мубарәк күнләр вә кечиләр инсанниң өзиниң йаритилиш сәвәбини идрак қилиши, йаратқучи билән йаритилғучилар оттурисидики мунасивәтни тонуп йетиши вә һайати үстидә чоңқур ойлнииши үчүн тепилғусиз пурсәттур.»

«рәғаиб» ибарисиниң «риғбәтлик», «арзулуқ», «җәзбидарлиқ» вә «адәмни тәлпүндиридиған» дегән уқумни билдүридиғанлиқини қәйт қилған әрбаш, аллаһниң рәһмити, мәғпирити вә немәтлириниң башқа вақитлардикигә қариғанда техиму күчлүк идрак қилиниши, сәмимий дил билән аллаһқа йүзләнгүнчиләрниң аллаһниң мәғпиритигә еришиши үчүн, мөминләрниң чин дилидин арзу қилиши үчүн, бу кечиниң «рәғаиб» дәп аталғанлиқиниму сөзлиригә илавә қилди.



مۇناسىۋەتلىك خەۋەرلەر