allah quran arqiliq raziliqini tiligenlerni salametlik yollirigha yétekleydu

türkiye awazi radiyosi: maide sürisi, 14 – 17 – ayetler. biz nasaramiz dégenlerdinmu (allahni bir dep tonushqa we muhemmed eleyhissalamgha iman éytishqa) mehkem ehde alduq, ular (injilda) özlirige qilinghan nesihetning bir qismini untudi, (buning jazasi üchün) ularning arisigha qiyametkiche adawet we düshmenlik salduq, (shu chaghda) allah ulargha qilmishlirini éytip béridu (yeni ular özlirining qebih emellirining jazasini tartidu)[14]. i ehli kitab! (yeni yehudiylar we nasaralar) silerge siler kitabta (injilda we tewratta) yoshurghan nurghun nersilerni bayan qilip béridighan we (yoshurghan nersilerdin) nurghunini kechüridighan (ashkarilap silerni pash qilmaydighan) resulimiz keldi, silerge allah teripidin nur (yeni muhemmed eleyhissalam) we roshen kitab (yeni quran) keldi[15]. allah shu kitab (yeni quran) arqiliq raziliqini tiligenlerni salametlik yolliri (allahning sheriiti we uning ehkamliri) gha yétekleydu, iradisi boyiche ularni (kufri) qarangghuluqidin (imanning) nurigha chiqiridu we ularni toghra yolgha hidayet qilidu[16]. meryem oghli mesih (yeni isa) allahtur dégen kishiler (yeni nasaralarning bir pirqisi) heqiqeten kapir boldi. (i muhemmed!) éytqinki, «eger allah meryem oghli mesihni, mesihning anisini (yeni meryemni) we yer yüzidiki barliq kishilerni halak qilishni irade qilsa, allah (ning iradisi) din birer nersini tosushqa kim qadir bolalaydu?» asmanlarning we zéminning we ularning arisidiki nersilerning padishahliqi allahqa xastur, allah xalighinini xelq étidu, allah her nersige qadirdur[17].