чехийә пирезиденти: мусулман көчмәнләрни чехийә вә башқа йавропа дөләтлиригә қобул қилмаслиқ керәк

түркийә авази радийоси хәвири: венгирийә хәвәр агентлиқи (MTI) ниң билдүрүшичә, земан бу һәқтә елан қилған байанатида, йеқинқи дәврдиму йавропаға көчмәнләрниң кәлгәнликини, әмма буниң һечқандақ мәсилә пәйда қилмиғанлиқини илгири сүрүп мундақ дегән: «йавропаға кәлгән мусулман көчмәнләр йавропалиқларниң дәл әксичә охшимиған мәдәнийәтләргә игә. шуңа, уларни йавропа җәмийәтлири билән биргәвдиләштүрүш мәсилисидә гуманим бар. йеқиндин буйан йавропада оттуриға чиқиватқан көчмәнлик еғир мәсилиләрни кәлтүрүп чиқириду. шуңа, мусулман көчмәнләрни чехийә җумһурийитигә вә башқа йавропа әллиригә қобул қилмаслиқ лазим.»

террорлуқ тәшкилати даешниң паалийәтлири сәвәбидин йавропаник бихәтәрлик вәзийитиниң бир йил бурунқиға селиштурғанда техиму йаманлишип кәткәнликини әскәрткән земан шималий атлантик әһди тәшкилатиниң даешқа қарши дәрһал һәрикәткә өтүши керәкликини қәйт қилди.

чехийә баш министири боһуслав соботкаму «‹право› гезити» ниң зийаритини қобул қилғанда бәргән байанатида, «раст гәпни қилсақ, бу йәрләрдә мусулманларниң күчийип кетишини халимаймиз» дегәниди.

вишеград гуруһиға әза чехийә җумһурийити, полша, венгирийә вә силовакийә қатарлиқ дөләтләрниң көчмәнләрни мәҗбурий қобул қилиш системисиға қарши икәнликини әскәрткән соботка һәр бир дөләтниң қанчилик көчмәнни қобул қилиш тоғрулуқ өзи қарар беришиниң зөрүрлүкини тәкитлигәниди.

чехийә һөкүмити көчмәнләр киризиси башланған күнләрдә мусулман көчмәнләрниң орниға хиристийан көчмәнләрнила қобул қилалайдиғанлиқлирини билдүргәниди. 

игилинишичә, 10.5 милйон нопусқа игә дөләттә 19 миңдин артуқ мусулман йашайдикән.