путин билән ши җинпиң қазанда көрүшти

түркийә авази радийоси хәвири: хитай дөләт рәиси ши җинпиң русийәгә қарашлиқ татаристан җумһурийитиниң пайтәхти қазанда өткүзүлгән кесәк алтун (BRICS) дөләтлири башлиқлар йиғини даирисидә пирезидент путин билән көрүшти.

сөһбәттә путин хитай билән һасил қилинған келишимләр даирисидә енергийә, санаәт, илғар пән-техника, қатнаш вә йеза игилики қатарлиқ саһәләрдә нурғун ортақ түрләрниң әмәлгә ашурулғанлиқини ейтти.

русийәниң хитай билән орнатқан һәмкарлиқиға алаһиддә әһмийәт беридиғанлиқини тәкитлигән путин: «русийә-хитай һәмкарлиқи дунйа сәһнисидики асаслиқ тәңпуңлуқ амиллиридин бири. дунйави бихәтәрлик вә адил дунйа тәртипини қолға кәлтүрүш үчүн барлиқ көп тәрәплик супиларда өзара маслишишни техиму күчәйтмәкчимиз» деди.

икки дөләт арисидики сода мунасивәтлири үстидә тохталған путин: «өткән йили өзара содида йаритилған рекорттин кейин, русийә вә хитай сиртқи тәсирләрниң сәлбий болушиға қаримай, иқтисадий тәрәққийат вә һәмкарлиқ йөнилишини давамлаштуруватиду. сода һәҗмимиз бу йилниң йанвар-авғуст мәзгилидә 4.5% ашти» деди.

ши сөзидә, хитай билән русийә оттурисидики мунасивәтләрниң «икки чоң күч» арисидики мунасивәт икәнликини, үчинчи тәрәпләрни нишан қилмайдиғанлиқини оттуриға қойди.

дунйаниң чоңқур өзгириш басқучидин өтүватқанлиқини тәкитлигән ши: «кесәк алтун дөләтлири бәлким тәрәққий қиливатқан дунйа вә йүксиливатқан базар дөләтлирини бирләштүрүшниң әң муһим һәмкарлиқ супилиридин бири болиду. баравәр, тәртиплик көп қутуплуқниң вә омумән сиғдурушчан иқтисадий йәршарилишишниң шәкиллиниш басқучидики бир амил сүпитидә һәрикәт қилиду» дегәнләрни қәйт қилди.