qazaqistan parlaménti türk meblegh fondi layihesini testiqlidi

türkiye awazi radiyosi xewiri: qazaqistan jumhuriyiti iqtisad ministiri elibék kuantirow parlamént yighinida qilghan sözide, türk meblegh fondi qurush kélishimi heqqide mundaq dédi: «mewjut yer shari xaraktérlik jughrapiyelik siyasiy muqimsizliq sharaiti astida qazaqistanning tashqi munasiwetlirini köp xillashturush bizning asasliq nishanlirimizdin biri. biz buning delili süpitide iqtisadning sijil éshishini emelge ashuushta türtkilik rol oyniyalaydighan her sahediki hemkarliqni kücheytish üchün tirishiwatimiz. bu dairide, biz ikki tereplik hemkarliq we köp tereplik munberler asasidimu ortaq paaliyetlirimizni aktipchanliq bilen dawamlashturushimiz kérek. bu munberlerdin biri türk döletliri teshkilatidur».

türk meblegh fondi türk döletliri teshkilatining tarixiy qedimi süpitide may éyida istanbulda qurulghanidi.

türkiye, ezerbeyjan, qazaqistan, özbékistan we qirghizistan eza bolghan türk meblegh fondi kélishimi ilgiri ezerbeyjan parlaménti teripidinmu testiqlanghanidi.

türk meblegh fondi türk dunyasigha nisbeten xelqara pul fondi teshkilati yaki dunya bankisigha oxshash salahiyetke ige teshkilat hésablinidu.

500 milyon dollarliq meblegh bilen paaliyet élip bérishqa bashlighan türk meblegh fondida her bir ezaning % 20 ülüshi bar.

meblegh salghuchilar we igilik tikligüchilerni qollashni meqset qilidighan türk meblegh fondi yene iqtisadning bir gewdilishishigimu töhpe qoshidu.

türk meblegh fondi arqiliq eza döletlerning iqtisadiy siyasetliri uzun muddet özara maslishalaydighan bolidu. shundaqla waqitning ötüshige egiship soda, mudapie we téxnologiye qatarliq sahelerde muhim ortaq meblegh sélish sharaiti yaritilidu.