министир муш: експортта рекортларни йаритишни давамлаштуримиз

түркийә авази радийоси хәвири: министир мәһмәт муш истанбулда ечилған 2022 - йиллиқ ташқи сода санлиқ мәлуматлирини елан қилиш йиғидики сөзидә, дунйа сода саһәси турақсизлиқ вә турғунлуқларни күтүватқан бир пәйттә түркийәниң екиспортта арқа-арқидин рекортларни йаратқанлиқини оттуриға қойди вә сөзини давамлаштуруп, дөләтниң нишанларни ашуруп орундап, рекортларға һәр күни йеңи рекортларни илавә қилғанлиқидин пәхирлиниватқанлиқини ейтти.

министир муш, түркийәниң иқтисадий ешиш җәһәттә алдинқи қатардики дөләтләр қатаридин орун алғанлиқини әскәртип, дөләтниң 2022 – йили %5лик иқтисадий ешишни қолға кәлтүрүп, тәрәққий қилған вә тәрәққий қиливатқан дөләтләрниң оттуричә сәвийәсидин хелила ешип кәткәнликини оттуриға қойди.

мәһмәт муш, түркийәниң сода министирлиқиниң експортни сиҗиллаштуруш, түркийәниң дунйа содисидики үлүшиниң ешишини муқимлаштуруш вә експорт қилғучиларниң дунйа базиридин тегишлик орнини елишиға капаләтлик қилиш үчүн давамлиқ тиришидиғанлиқини билдүрди.