дөнмәз: ширнақтики байқаш қуруқлуқтики әң чоң нефит байқашлириниң бири болуши мумкин
түркийә җумһурийити енергийә вә тәбиий байлиқлар министири фатиһ дөнмәз, ширнақта байқалған нефитниң йеқиндин буйанқи қуруқлуқтики әң чоң нефит байқашлириниң бири болуши мумкинликини ейтти.
түркийә авази радийоси хәвири: министир фатиһ дөнмәз бир хусусий телевизийә қанилиниң сөһбәт пирограммисида, ширнақтики нефит чарлаш хизмәтлири тоғрисида мәлумат бәрди؛ у, йеқинқи бир йилдин буйан райондики тәкшүрүш – чарлаш хизмәтлириниң салмиқиниң ашурулғанлиқини, униңдин илгири бихәтәрлик мәсилилири сәвәбидин тәкшүрүш хизмәтлириниң елип берилалмиғанлиқини тилға елип: «һазир әскәрлиримиз террорчилардин халийлаштурған районларда тәкшүрүш вә бурғилашлиримизни ишқа ашурдуқ» деди.
«ширнақниң габар теғи вә әтрапидики төт қудуқта һазирқи күндилик нефит ишләпчиқириш миқдари 1200-1300 варил әтрапида» дегән дөнмәз, сөзини давамлаштуруп: «нишанимиз у йәрдики қудуқ санини 10 вә униңдин ашуруш» дегәнләрни қәйт қилди.
министир дөнмәз, габар теғиниң башқа бир йеридики чарлаш хизмәтлириниңму тамамлиниш алдида туруватқанлиқини билдүрүп: «бу йеқиндин буйанқи қуруқлуқтики әң чоң нефит байқашлириниң бири болуши мумкин, буни тәкшүрүш тамамланғандин кейин елан қилимиз» деди.
у, нефит записини ениқлаш хизмәтлири тамамланғандин кейин бу йилниң ахирида йаки келәр йилиниң бешида бу һәқтә байанат елан қилинидиғанлиқини, буниң билән бирликтә, ширнақтики нефит чарлаш паалийәтлириниң давамлаштурулидиғанлиқини әскәртти.
